”بالحرب ما حدا بغير ضباطه”
يعني سلامة اللي قال انه حافظ على النظام ٢٧سنة ضابط عندكم.
فيك تشرح حرب بين مين ومين؟ وعن من عم يدافع هالمغوار.
وكم شخص حمى او انقذ؟
وشو بيصير بضابط هو يقتل شعبه مش العدو.
وطولوا بالكم
البطريرك يقول ما حدا بيقرب على الحاكم. والمفتي بيصلي بالسرايا دفاعا عن أي فاسد سني.
والشيعة الشيعة. مش يا ويل اللي بيتجرا يتحدى الثنائي. يا ويل حتى ان تجي على راسه فكرة تغيير القيادة او العدة عندهم. التفكير كفر ممنوع.
والروم والدروز والزعامات المخبية عندها مطلوبين.
يظهر كلهم ضباط مش على جبهة داخلية. والعدو العدو… حزرتوا؟ اللي اخترب بيته وممنوع حتى يحكي او ينزل يطالب بحقه.
منظومة كاملة متكاملة..
المفارقة بلبنان ان المقترفين بدل ما ينزووا، بيطلعوا وبيصرحوا.
ودائع رح تحصلوا.. وبيجي من يسألني: شو رايك فعلا راحت الودائع؟ الأخ مش واعي انهم بعدهم عم يأخذوا اخر كم قرش.
بدكم تعرفوا وين راحت؟ اسألوا كل الاحزاب ورؤساءها: من وين تمويل كل المكاتب والزلم والمحلات ومصاريف الحرس والكشاف والموسيقى. الا اذا كانوا متل سلامة معهم مصاري من زمان واستثمروها وضاعفوها متل ما قال. بس مصرياتكم خسروا باستثمارها.
يا عمي بشرفكم.. ما عاد يسألنا وين راحت المصاري. بكرا جاوبوا حالكم بالانتخابات. والله انهم بيعتبروكم بالجيبة الصغيرة، وانكم حتنزلوا تصوتوا لهم متل الغنم.
كل عام وانتم بخير
