١٠ آب ٢٠٢٤ ~مجالس نواب فاشل

~مجالس نواب فاشل.. وبعده رئيسها بيصرح بشو بيرضى وبشو ما بيرضى، وكأنه من المعصومين..
~حكومات فاشلة ونفس الشيء. رؤساءها مفكرين حالهم رجال دوليين..
~ووزراء ونواب وقضاة وضباط فاشلين، وبيتصرفوا كرجال دولة..
~ واعلاميين مأجورين رخيصين بيتصرفوا كأنهم صانعي الملوك.. وهم بالسر اقل من حاشية عندهم..
~وشعب جزء كبير منه غاشي وماشي، لاحق مجرمين حرب وسلم كالغنم والزومبي..

كل هالجماعات خلقوا دولة ومجتمع فاشلين، ووطن مفقود تلخص بمطعم وبلاج وسهرة.. وحضارة different..

لازم لازم يتدمر الهيكل.. القلعة من ورق المبنية بوهم ارزات عشتروت ومجد مزيف..
اقراوا القصة ادناه اللي بتلخص الوضع.. واضحكوا وابكوا.. 👇👇👇👇
بتنذكرقصة واقعية للحوار العقيم مع بغال وبغال وبغال..

في الماضي كل القرى كان لها بيدر للحصيدة يتشارك به كل سكانها… وبيدرنا كان في منتصف البلدة.
فحدث ان الغلال في البيدر، واحد الجيران له بغل تركه فالتا، فعاث بالغلال والتبن بعثرة، فحضر الجار الاخر وهدأ من روع البغل، وربطه على البيدر لتخفيف الاضرار، وقصد الجار صاحب البغل يكلمه:
يا جار، البيدر فيه غلال لكل الاهل، وبغلكم كان فالتا يعيث بعثرة، وعندما رايته ربطته هناك، فنامل منك ان تنتبه للموضوع وتبقيه مربوطا، وقد يكون لكم غلال هناك كذلك.
فاجابه: وشو خصك انت بالموضوع، انا حر والبغل حر، وبدو يضلو فالت، وليش مين اذنك تربطو؟؟؟
فاجابه الجار بهدوء تام:
والله يا جار ممنونك، بالحقيقة غلطنا غلطة كبيرة…. لو عارفين بدك تجاوب هيك!!! كنا ما تعذبنا وجينا لعندك… كنا تفاهمنا مع البغل… مش افضل قولك؟

(غدا: كلام بدقائق الى شعب الطوائف..
والى الزعامات بالأسماء. وسؤالهم: شو بدكم بعد؟)

١٠ آب ٢٠٢٤
حسن أحمد خليل