يا حضرات حكومة رئاسة ووزراء..
وشؤون إجتماعية..
يا حضرة رئيس مجلس، اللي قلت لك عتب على الدولة لتقصيرها..
يا حضرات نواب مشغولين بزيارات وفود بعضكم لبعض لانكم محتارين كيف تنتخبوا رئيس لكل واحد منكم له شقفة منه..
يا هيئة عليا للاغاثة..
يا عالم يا هو وووو و.
طائرات من الإمارات والسعودية ومصر والاردن والغرب والشرق عم تنزل وفيها مساعدات.
مراكز الايواء اللي انفتحت وعم تتمون بمبادرات فردية، ما حدا وصله بعد كرتونة من هالمساعدات..
العالم مذلولة على الارصفة.. هولي ناس عندهم كرامات واولاد بيوت، وكل واحد منهم، ولو جار الزمن عليه، عزيز رافع راسه، ما بينزله لحدا.
جريمة فوضى وتقصير الدولة، والتنفيعات الضيقة، افظع من سرقة الودائع. هيدي اذلال وسرقة كرامات.
صعبة على دولة تعمل احصاء بعدد خيم وحرامات وبطانيات وفرش واغطية مطلوبة لمليون نازح؟
صعبة توزيع الأدوية وحصص غذائية في الخمس محافظات، او بس بتعرفوا تنظموا انتخابات بيوم واحد فيهم..
حسنا فعل الاستاذ حسن بزي بتقديم إخبار، بتهمة التقصير الوظيفي ضد من يثبته التحقيق.
اصلا لو فعلا بيطبق عقوبة التقصير الوظيفي كان كل البلد بلا حكومة ولا مجلس نيابي ولا دوائر.. وهو كذلك.
١٠ ت١ ٢٠٢٤
حسن أحمد خليل
