١٤ ديسمبر ٢٠٢٤ الصورة سوداوية من كل الجهات.. جهات كبرى بتخطط وبتنفذ وبتقسم دول وبتفرق..

الصورة سوداوية من كل الجهات..
جهات كبرى بتخطط وبتنفذ وبتقسم دول وبتفرق..
ومجموعات في هذه الدول بتنفذ تطوعا..
خططوا انو الشعوب يكرهوا بعضهم.. كرهوا..
تفرقوا.. تفرقوا..
ما يوثقوا ببعض.. وصار..
مسيحيين خايفين ومتقاتلين وانانيين ومنافقين بالمسيح وبالله ومارون وشربل. المهم رئاسة واحزاب فاسدة.. باسم الحقوق المسيحية.. متل فرق فوتبول بيلعبوا مباريات والكل بيصلب على وجهه انو الله حيختار الرابح. الكل منكر انو الله ما بيلعب فوتبول ولا على باله..

واسلاميين.. هول مع ايران وعلي والحسين.. واحقاق الحق ونصرة المظلوم.. وجابوا على الدول في العراق وسوريا ولبنان مجموعات من افسد الفاسدين.. نهب وسرقة ولطم بعاشوراء..
المهم يقاتلوا كل الدنيا ليوم الدين.. ليش؟ للظهور..
وهول مع تركيا ومصر، وعرب ولا عروبة..
بيستدعوا الله حسب الظرف والتوقيت والحاجة..
ظهروا.. اختفوا.. ظهروا..
وذبح ونحر.. وسلطة..
وهلق طلعوا معاوية وعمرو والامويين من جديد.. ورجع الحكي عن صراع علي ومعاوية ويزيد والحسين..
وهولي دروز موحدين، وعلويين ضايعين بين عروبة واسلام.. وارمن وسريان واشوريين، تايهين من هجرة لهجرة كل كم سنة، يدوروا على امان..

شعوب وناس.. وامم..
غباء غباء وجهل منتشر وين ما كان باسم الله..
والكل بيحكي عن الله..
والله اللي بيتاجروا فيه مات..
وهني كلهم تشاركوا بقتله..
بعد فيه الله اللي حدوده لامحدودة.. بين اللانهاية السلبية الى اللانهاية العكسية الايجابية..
لا مكان للصفر.. ما في رقم صفر..

سواد اسود وين ما كان.

تسابق دولي واقليمي لجني المغانم عند اعادة رسم حدود لدول كانت في وسط العروبة والاسلام..
ماتت العروبة وسيعاد صياغة اسلام جديد لاجيال قادمة..

بعد في الله اللامتناهي، اللي كل الكرة الارضية مع ال8 مليار وحش العايشين عليها، ما بيسووا ذرة غبرة كونية عنده..

نرجع للجد..
مين حيجي رئيس جمهورية؟ وشو قرووا موارنة لبنان والشيعة والسنة؟
غباء ولون اسود وين ما كان.. بس الطيارات والمطاعم رجعت مليانة..
هلق عرفتوا ليش سقراط رفض الهرب واصر على شرب السم قبل موعده؟

١٤ ديسمبر ٢٠٢٤
حسن أحمد خليل