٣٠ ت١ ٢٠٢٤ حكى معي الله بالليل..

حكى معي الله بالليل..

حدا بالليل فيقني..
ما خفت..
قلت خير؟
سمعت حدا عم يقول لي:
بعرفك لبناني وكل يوم بتكتب بغضب ل17 مجموعة لبنانيي، كل واحدة مفكرة انو انا الله ملكها وحدها..
ومنهم بيضلوا بيدعوا انو انا اعطيتهم المجد لهم، وما لحدا غيرهم.. ومختلط الامر عليهم بيني وبين مار مارون وشربل..
ومنهم كل سنة بيعملوا نحيب وصريخ وانو انا عندي اهل البيت وعلي وحسين هني المفضلين عندي.. والياقيين ضالين..
وغيرهم بيحكي عن انو هني الوحيدين اهل سنتي وانهم الوحيدين اللي متبعين رسولي محمد..
وفي موحدين وجماعة متري ونقولا وبيتر وبول وارمن وسريان وعلويين.. وفي غيرهم وغيرهم..
ليك..
قوم اكتب وقول لهم انو يفكوا عني شوية..
عندي 8 مليار غيرهم على الارض، .. وكل يوم بيولد اضعاف عددهم كلهم..
وعندي الكون كله لازم ديره..
تاجروا فيي وبحقوق كل مجموعة منهم كتير..
بلغهم اخر انذار مني:
اما بيتوحدوا ككل علي وعلى البلد اللي اعطيتهم اياه، مش كل واحد ينتش شقفة مني، وما يعبدوا غيري زعماء وحوش بشكل بشر منافقين، او رح شقفهم تشقيف ما يعودوا يقوموا منها..
آخر إنذار..
العمى.. انا الله ما خلقت شعب افجر واوقح من هيك..
اعطيتهم كل شيء..
ارض وبحر ونهر وجبل وسهل وتلج وشجر ما طاب.. كل كم سنة بيدمروا كل شيء.. وبيلحقوا مجرمين..
قول لهم فكوا عني..
عندي غيرهم..
يا بتتوحدوا علي وعلى نعمي والا رح افنيكم..
آخر إنذار..

٣٠ ت١ ٢٠٢٤
حسن أحمد خليل