٣ كانون الثاني ٢٠٢٥ سيادة. وسياديين.. معانا طناجر.. معانا صحون..

سيادة. وسياديين..
معانا طناجر.. معانا صحون..

وفود اجنبية ووفود عربية..
وخماسية.. وسداسية….
وموفدين.. ووزراء خارجية..
وزعماء لبنانيين..
كلهم من اجل “السيادة”..
سيادة.. سيادة..
سياديون.. سياديون..
دوارين في الشوارع..
دوارين في الحارات..
معانا سيادة.. معانا كرامة.. للبيع.. او للشراء..
معانا سيادة ب5 دولار.. وسيادة بدولارين.. وسيادة ببلاش، بس المهم يرضى الاسياد..
تعا تفرج.. تعا شوف..
نواب.. احزاب..
128 نائب ما بيتنازلوا عن السيادة.. بس منهم فوق ال 100 نائب رسوم متحركة.. بيتحركوا متل ما بيتحرك “المعلم”، وكيف ما قلب بيقلبوا وبيقبلوا.. وبيطلعوا ضيوف سيادة على تلفزيونات سيادة..
“والمعلم” بالنهاية بيرضخ حسب مزاج معلمه “وطويل العمر”.
انطيه الف دينار. امرك مولاي..

سيادة سيادة..
معانا صحون.. معانا طناجر.. معانا نواب سيادة..
قتل وذبح.. في..
سرقة خزينة.. في ..
بدكم نهب ودائع.. في..
بدكم قضاء بالخدمة بيرشح سيادة.. في..
بدكم مجلس نواب اسياد وعبيد.. في..
واللي ما بيجي لعندهم عبيروت.. بيروحوا لعنده على كل العواصم..
سيادة على deliveroo وعلى uber..
سيادة سيجار في..
وسيادة اركيلة في..
وسيادة خطبة جمعة وعظة أحد.. وسيادة كأس عرق.. كله موجود

لا سيادة ولا بلوط..
ما في يا صفية الا انت وانا سياديين..
ومنشان هيك مستعبدينا..

٣ كانون الثاني ٢٠٢٥
حسن أحمد خليل