تحذير خطير جدا من “المعارضة اللبنانية”..
اجتمعوا نواب..
وقرروا انو نظرا للمفاوضات التي تحصل دوريا في باريس، وهو مش دريان، وموقف الجامعة العربية المستحدث، وهو مش زكي، ولقاء قمة شنغهاي وانضمام ايران لها، وامكانية انضمام تركيا العام المقبل.
ونظرا للتقارب بين الأطراف العربية والخارجية في الملفات الإقليمية، اجتمعت المعارضة وقررت:
~حنرجع لمعزوفة “نحن فينيئين” ، وما عاد البعد العربي بيهمنا.. خلي الفارس السعيد التائه الشارد الحائر، يحكي لحاله.. ما خصنا فيه..
~لا يهمنا شانغهاي، ولا بيهزنا حتى الناتو.. ولا الاتحاد الاوروبي ولا العالم العربي البداوة.. نحن الحداثة اللي بنحكي فرنساوي مع انكليزي ومعهم كم كلمة فينيئية، سنقوم بالاتصال بكواكب اخرى لطرح القضية اللبنانية، وجوهرها بنحب الحياة، والتصدي لمحاولات المس بالموسم الصيفي والشتوي، واكل السنيورة في الريف على الحاصباني والعاصي اللي بيشبهونا.. هونيك الضو والوضوح الصادق..
وندعو جميع الاطراف المضللة في العالم بفتح حوار معنا، وإلا؟
مع العلم انو نحن مش صعبين. يعني مجرد زيارة لموفد يجمعنا متل الماضي، او لفتة خاصة، مع كاميرا او سرية، وبدون ويكيليكس، بيمشي الحال..
يا عمي اقله تلفون..
وإلا سنتصدى ونبرهن مرة تانية انو مين ما تحدانا بينكسر على سفوح الارزات وشعرات عشتروت والمجد، الذي لم يعط حتى للفاتيكان، بل لنا وبس. وخليه المبعوث البابوي والماموي يرجع على روما.. قال روما قال.. يا عمي هيدا لبنان المجد والخلود. (الى النوم) .. شو يعني روما او باريس او حتى واشنطن..
(جورج واشنطن على ورقة المئة دولار موضوع تاني… بنحكي..)
قومي يا صفية. صبّي شاي ودوري التلفزيون. عم يقولوا رجعوا يحطوا مسلسل ابو سليم الطبل.. قومي..
٧ تموز ٢٠٢٤
#حسن_أحمد_خليل
