بعد في يومين لاحتمال انتخاب رئيس ..
خلينا نحلل سوا تركيبة المجلس النيابي.. والسيادة.. والسياديين..
وكمان احتمالات نوايا اللعبة الدولية للبنان..
الاحتمالات:
ادخال لبنان في منزلق سلبي وفوضى صراعات.
او ابقاء الوضع على حاله تحت سيطرة الاحزاب والزعامات اللي دمرت ونهبت..
او مساعدة لبنان على حد ادنى من الاستقرار..
او قرار استقرار لبنان ثم ازهاره بفريق سياسي جديد.
كلهم وارد..
التصويت:
~نواب الدروز واللقاء الديمقراطي والحزب التقدمي الاشتراكي. سميهم متل ما بدك : 9 نواب, لكن صوت واحد هو البيك ب9 اصوات، وقرر البيك اصواته لعون.. اكثر واحد بيدرس اللعبة الدولية، وبياخذ قراره بسرعة، ومرتاح مع نفسه
~ تستمر محاولات التعاطي مع ال27 نائب شيعي وكأنهم صوت واحد، ولو بدون قناعة. الاستاذ عنده 13 صوت، بس بدو ال27.. مع محاولات الاصفر اخيرا وبعد خراب البصرة التمايز.. الأستاذ ما بدو عون. ما بعمره بيستهضم حدا ممكن ما يكون عجينة بايده..
الاصفر عنده 13 صوت، وما عنده مشكلة بعون..
السؤال المليون هو شو بيعمل الاستاذ اذا اصروا اساتذة الاستاذ من خليجي واميركي على عون.. واذا عاند الاستاذ، شو بيعمل الصوت الاصفر؟ هل شو مرة بيتحرر، او بيضل بالعقد النفسية اللي راكبتهم من 30 سنة؟ وهل هالمرة ما بيسال عن فتوى او تكليف ما، من مصدر ما؟
~ القوات. 19 نائب ،لكنهم صوت واحد. هو 19 صوت الحكيم.. والحكيم ركبت برأسه يكون هو المرشح وبدل ما يقنعوه اللي حوله بالاستحالة، صاروا يزايدوا عليه. يعني متل ولاء كل نواب الاحزاب للمعلم؟ .. لكن شو بيعمل الحكيم اذا سمع قرار واضح من المعلم الكبير ومن الخليجي ان القرار هو عون؟ هيدا ايضا سؤال بمليون..
~ التيار الوطني الحر. 13 نائب. صوت واحد ب13 صوت، هو المهندس.. عم يتقاطع مع اللي نكد عليه ال6 سنوات نكاية بعون. السؤال شو بيعمل اذا مشي الاستاذ برغبة المعلم الكبير؟ هل بيضل وحده بالساحة بالعناد، ام بيلحق؟
~كتائب. 3 نواب. 3 بواحد هو الشيخ.. وأكيد اذا مشي القطار بيطلعوا فيه مين ما مان عم يسوقه..
~ المردة وحليفه. 3 نواب بواحد.. على الأرجح ماشيين بعون من كثر قرفهم من حلفائهم.. وبيمشوا بعون او باية تسوية بيرضوها الكبار.. ايضا صار فاهم اللعبة.
~ حوالي ٢٣ من النواب السنة. هم 22 بصوت واحد هو من برا ومن جوا.. وعودة الى الاصل والعروبة .. ومين من تزوج امي بيقول له يا عمي.. وناطرين يعرفوا من عريس امي.. وعلى الارجح بيمشوا بعون او بالتسوية الكبرى شو ما كانت. المهم المرجعية واحدة..
~ على الاقل ٨ نواب من ١٣ متغيريين بصوت واحد، ايضا من برا..
~ وعدد من النواب بيشوف موجة الصوت اللي من برا وبيلحق..
يعني الانتخابات كلها ب6 او 7 ناخبين كبار ناطرين ومنتظرين.. سيادة.. سيادة.. وامرك سيدي..
15 نائب بالكثير حيصوتوا بناء على قناعة بشخص ما لهدف ما ببرنامج ما.. والف تحية لهم.. وهولي اللي فعلا نواب امة ومرتاحين مع حالهم..
اصلا ما حدا فارقة معه لا جمهورية ولا زفت. المهم شو بيطلع له بعد الانتخابات.. في حكومة وفي وزارات وتعيينات وقضاة وضباط ومدراء عامين وادارات ومصالح..
وفي ناس ناطرين اللي ممكن يجيبوا شنط متل ايام الطائف..
امير المؤمنين :انطيه الف دينار.
امرك مولاي.. هل قلت دولار او دينار؟
وتعا تفرج تعا شوف..
ومعانا طناجر معانا صحون ومعانا كبايات ومعانا فناجين قهوة.. ومعانا.. سيادة..
ما حدا عم يشوف التطورات السريعة بسوريا وعند الاتراك وشو جايي عالمنطقة..
المهم “أنا”.
ويعيش يعيش الزعيم..
ويعيش مجلس النواب..
والمهم وقت الميلاد كان البلد مولع.. ووقت السكي حيولع..
وبالصيف ما في كرسي عالبحر..
والعقارات تحسنت
وحيرجعوا المصارف.
لبنان مولع..
على شو النق دايما..
خلاص بلا نق..
شو مفكر لبنان سويسرا؟
كل عمره هيك وحيضلوا هيك.. ونحن ما بدنا اكثر من هيك..
وما عاد بدنا نسمع حدا ينق..
اللي بدو ينق ما يجي، ويريحنا من صوته ونقه.. منيح..
ما حدا يا صفية طايقنا ولا طايق حكينا. وين الشاي يا صفية.. او بتعرفي؟ قومي جيبي كبايتين عرق. واحدة لي والثانية لي.. وانت فوتي نامي..
٧ كانون الثاني ٢٠٢٥
حسن أحمد خليل
