اوف.. اوف..
.
طيب اتفضلوا..
هيدا بيقول الشيعة ما بيشبهونا..
وهيدي بتقول نحن بحرب معهم من 1400 سنة..
وزعيم ورق “سني”، من زمن “يا قوم”.. بيقول انو السنة كان فيهم يقتلوا الشيعة والمسيحيي والدروز من 1400سنة، بس هني مسالمين ما عملوها..
وهولي دروز هم يراقبوا بالجبل كل شيعي نازح وبيقولوا تاريخ الجبل من 2000 سنة درزي..
وشيعة خطابهم دايما قائم على تاريخ 1400 سنة..
مسرحية مهضومة..
مش بس انو الاحزاب اللبنانية عندها فروع بالعواصم العالمية.. كمان كانت موجودة من ايام المسيح ومحمد..
بالمناسبة بعض اللي حكيوا ما بيسافروا الا بطيارة خاصة للخارج.. مش عالجمل.. وهونيك بيقدموا الطاعة، “كمتمدنين ومدنيين علمانيين مش طائفيين”.
شوفي يا صفية..
اللي مثلي ما بيستفزه ولا بيزعل من هالكلام..
هولي العالم اللي عم بيحكوا مش ذنبهم..
هولي انزرع فيهم الحقد والجهل من قبل زعيم وراء زعيم وراء زعيم ما عندهم وسيلة لتثبيت زعاماتهم الا بالهالزرع..
هولي اللي حكيوا سمك صغير بيلحق كم سمكة كبيرة بياخذوهم عند الحوت. السمكات الكبار بيزمطوا والحوت بياكل السمك الصغير..
يا صفية. هيدا الوضع هو ذاته من 43 لليوم.
شو رايك؟ بعد ممكن يركب بلد زعاماته بينزل دم بين اسنانهم، وبيسلحوا البسطاء اللي حولهم.. وبيحكوا عن السلاح..
مش قلت لك يا صفية انو البشر سلالة قابيل الشرير اللي قتل اخوه هابيل الادمي..
يا صفية بس شغلة زعجتني.
لاول مرة هولي اللبنانيي عم بيخلوني بلش شك بالأديان.. خيفان كتير يا صفية..
ما تطفي الضو.. كيف بدو يجي للواحد النوم، وفيه انين موت قوي كتير بكل المناطق، ببلد بيسموه لبنان.. انا بسميه “ورقة شجر بخريف آت”..
٩ آب ٢٠٢٤
حسن أحمد خليل
Translate post
11:02 AM · Aug 9, 2024
·
9,289
Views
