22 يونيو · 2023
اسرار خاصة للسيد لو دريان.
بطاركة منهم دريان كتير. ومفتيين، منهم دريان وقبلان..
وزعماء وفراعنة وزلم وازلام…
وعجقة وهجقة ورجقة…
خير، شو في؟
قالوا في موفد اسمه لو دريان..
وما عدنا نعرف مين دريان ومين عرفان ومين حردان ومين زعلان ومين قبلان ومين قرفان..
يا سيد لودريان.. حكيناك وما سمعت..
انت مش دريان انو هولي تشاطروا على باريس ١و٢و٣ اللي امنهم رئيسك الراحل شيراك.. وسرقوا المصريات، وركبوا ديون.. ولو عملوا باريس ١٠، لنهبوه.
ومش دريان يا مسيو لو دريان، الله لطف برئيسك الحالي ماكرون، انو ما غطس ب مؤتمر سيدر ال١١مليار.. كانوا نهبوه، ونهبوا سلالة ماكرون ونهبوه المليارات.
كذبوا على كل رؤساءك السابقين انو فرنسا امهم الحنونة.
بيمدحوا باللي بيدفع.
هل دريان شو حكي عنهم الامير محمد بن سلمان، وعن ضياع ١٧ مليار دولار عليهم.. وشو مدحوا بقطر..
مش دريان يا مسيو لو دريان، هولي قرفوا الكرة الارضية منهم، وكعوا امة محمد وعيسى..
حتى على الله حرابيق.
بيتاجروا بالله، مع المفترض ممثلينه على الأرض، المتنكرين بثياب رجال دين ..
يا سيد لو دريان ومش دريان.
يا اخي متل ما عم تسمعهم، وشكلك قرفان، وانت مش دريان. اسمعنا كمان واضحك.. وبتصير دريان:
نحن المنتفضين عليهم ما بدنا اياك، لا انت ولا غيرك يحل الوضع، ولا يصالحهم.
بدنا اياهم يضلوا متخانقين..
هولي متل القرود.. اذا تصالحوا بياكلوا كل محصول الموز وشو ما طلع بايدهم..
انت مش دريان يا مسيو لو دريان انو ولا واحد منهم بيفتح ملف واحد تاني، وبنفس الوقت، بيدعوا بدهم سيادة ودولة..
ملف واحد بس..
وشو ما حكيت عنهم، وعن زوجاتهم وعائلاتهم وازلامهم، حتى ما نقول شيء تاني، بيقولوا عم تشتي.
هولي، اكثرهم يا مسيو لودريان، جوعان وفجعان. وما بيشبعوا..
الله الاوحد عندهم، هو رياض سلامة وبيعبدوا الدولار والكرسي..
اصلا انت فكرك هني متخانقين على مبادئ؟ هولي ما بيعرفوا يهجوا او يكتبوا الكلمة.. هولي عصابة ومافيات، متخانقين على الحصص..
بس يا سيد لو دريان، لازم تكون دريان ان الشعب صار دريان، وزبلهم.. الا لحيسة الصحون..
الشعب ما عاد يهمه..
بدل الكهرباء والمياه، جاب مولدات وشمس وسيتيرنات.
بدل الليرة، جاب دولار..
وبدل البنك، جاب شنطة.
وبدل سيرتهم ووجوههم، راحوا الناس على المطاعم والمقاهي والمسابح.
اتكل على الله يا سيد لو دريان..
وروح صيف..
الموفد الوحيد اللي بيحلها بلبنان, هو اذا الله رجع وقرر يبعث نبي جديد…
بس انتبه. مش اكيد بينجح.. هولي أسوأ من يوضاس وبني قريش..
رح خلي الشعب اللي عم يقرا يتحزر مين الوحيد اللي اكيد بيحلها..
٢٢ حزيران ٢٠٢٣
حسن أحمد خليل
