23 مارس · 2023
شو فهمه صندوق النقد؟
وفد الصندوق اصدر بيان ان على الحكومة وقف الاقتراض من المركزي، وان لبنان يمر في مرحلة خطيرة جدا.
وحكي عن الكابيتال كونترول ورفع السرية وتقييم المصارف..وتقريبا اعلن افلاس المصارف.
جماعة الصندوق مضروبين بعقلهم.
الظاهر ما سمعوا عن اجتماع الميقاتي وبري، ولا عن تصميمهم على اقرار القوانين، وخاصة التوقيت الصيفي، للنهوض من جديد.. وحيستعينوا بمستشاريهم خاصة وزراء المالية الحالي والسابقين، ونواب لجنة المال والموازنة، ولجنة الرقابة على المصارف، اللي بعهدتهم كلهم افلست الخزينة والمركزي والمصارف،وتبخر مليارات مش معروف مصيرها.
وقبلها زار ميقاتي المفتي. الى هذا الحد هو يحاول.. ولو..
وما بيعرفوا ان رياض سلامة طمن الرئيسين ان الليرة والوضع تحت السيطرة.
لازم يروقوا شوية جماعة الصندوق.
كل القضاء الاوروبي ما طلع معه شيء.
وقبلها باريس ١و٢و٣ وعلى شعرة كان صار سيدروس..
هلق كم منظر من صندوق النقد بدهم يعلموا الرئيسين ولجنة المال والموازنة واللجان المشتركة ورياض سلامة شو لازم يعملوا…
روحوا يا عمي. روحوا..
رجعوا على واشنطن.
هيدا لبنان، مش اي دولة؟؟
وفهموها: الودائع قدس الاقداس، والليرة حتشوفوا حترجع الى ٣،٢٠٠. وضابطنا ما منغيره وقت الحرب.
قال صندوق نقد قال..
اتكلوا يا جماعة..
٢٣اذار ٢٠٢٣
حسن أحمد خليل
