26 مايو · 2023
زعيم تتقلص عدة الشغل عنده.
~ميشال المر توفى.
~فؤاد السنيورة استنفذ.
~سعد الحريري على البحر في ابوظبي شمتان.
~نجيب ميقاتي، ما مصدق يروح على لندن..
وليد جنبلاط واضح قرفان، واستقال وسلم ابنه.
~بعض التغيريين اللي زرعهم طلعوا مش بحجم المتوقع.
~ورياض بعد شهرين متكل..
~الاموال شحت..
~وظائف ما في..
~مجلس نيابي ومطرقة معطلين..
خفت عدة الشغل.
شو العمل؟
طبعا اهم شيء نعمة الحليف اللي ما بعمره افشله، واعطاه كل شيء.
حاضر وموجود دائما..
بس ما بيكفي..
ما عاد في إلا يستدعي الإحتياط المزروع عند التيار الوطني الحر…
يوحي لواحد منهم يعمل “جولة رئاسية”، وخلي الناس تفهمها متل ما بدها..
ويطلب من نائب قيادي ان يرشح حدا من عندهم رئيس، ونائب تاني يلمح عن نفس الشخص انو مؤهل يكون حاكم..
ونائبين او ٣ يغردوا على هواهم..
والشباب جسمهم لبيس، وما بيخيبوه، وما “توصي حريص”..
نواب تيار، من سنة بس جددوا النيابة. والختيار الجنرال، بعده ما مات.
اقله، ولو…
ينتظروا.. لاحقين.
بس لازم ينتبهوا.
هل مطرح ما رايحين، او راحوا اكيد مضمونين؟ ام مصلحة مؤقتة؟
لو بيعرفوا انو مطرح ما رايحين، الوضع مش احسن بكتير من عندهم. كمان هونيك كل مجموعة ناطرة، ومستنفرة، وبلش التمركز والمعسكرات…
بس ناطرين خوفا مش ذوقا.. ناطرين..
يا ريت نواب التيار اللي غيروا البرتقالي بكير، بيسالوا معنى المثل: “اكلت يوم اكل الثور الابيض”..
بني آدم ما بيتعلم..
في مثل ثاني:
طيب ما متت. ما شفت مين مات..
ولو..
يطول باله الكل.
كل الاحزاب مصيرها مثل بعضها.
لان كلها غابت عنها البرنامج. كلها مصالح مع زعيمها.
وقت اللي بيروح، بيروح الحزب.. او التيار او الحركة..او البركة..
ما حدا يستعجل..
التاريخ هو الوحيد اللي بيمشي على الدقيقة.. والحقيقة..
٢٦ ايار ٢٠٢٣
حسن أحمد خليل
