28 مارس · 2023
*طلعت قصة الساعة مش مؤامرة، ومش محرزة. (بس هالمرة ما ظبطت)*
وطلعت القصة ببساطة تفاهة وغرور.
من اللي سمعناه، نستنتج الآتي:
~بري من ٣ سنين حط برأسه تجميد التوقيت الصيفي. باعتقاده بيكسب ساعة برمضان. نسي اان الإفطار متعلق بالغروب، مش بالتوقيت.
~ طلبها بري من حسان دياب، اللي من “جرأته” خاف يرفض، فحولها الى محمد الحوت، اللي جن جنونه، ورفض. هكذا إجراء له تاثير على الطيران.
~ العناد دخل على الخط.
~ طلبها بري من ميقاتي من سنة.
ومن كم شهر جدد الطلب.
الميقاتي من “جرأته”، متل حسان دياب، حط الموضوع عند الوزير حمية: وكلفه إما يقنع بري باستحالة هيك طلب، او إقناع الحوت بالتجاوب والتطبيق.
الحوت رفض. وحمية ايضا “بجرأته”، متل دياب وميقاتي، وبالنظر لمن يمثل في الحكومة، ما بيقدر يرد طلب بري. “بنلبيه لو طلب حليب الصفور”.
~ زاد العناد بمبدأ “انا نبيه بري”. اللي بيقوله بدو يصير. ومش شايف قدامي “لا الحوت ولا اللي أكبر منه”.
لذلك ما كانت صدفة تمرير الفيديو بالصوت والصورة.
بري قصدا طلب ابموضوع على الكاميرا من ميقاتي، اللي بلع لسانه، وتجاوب، بعد ما ظهر “هيبته” كرئيس حكومة.
إتصل بري بالحوت، اللي بلع لسانه، وقال له متل ما بتريد.
الوزير حمية طبيعي بالع لسانه امام بري.
مكية اختفى.. وطلع القرار..
~الله لطف انو هالمرة جنبلاط ما تجاوب مع حليف العمر، وهو اللي قلب الطاولة، مش بس الاعتراض المسيحي، وتم التراجع عن القرار.
*بيبقى سؤال اساس: شو دخل رئيس سلطة تشريعية بالتوقيت الصيفي؟ او في امر خارج ترؤوس التشريع.؟*
*وسؤال تاني: اذا هالمرة بفيديو ٣٠ ثانية، سمعنا نموذج من مداولات الطبخ في عين التينة، واكتشفنا النوعية من النقاشات وتفاصيلها.*
هل حدا بعد بيستغرب ليش خربان البلد؟
ما عاد حدا يظلم يوسف خليل، اللي حابب يمشي.
وقبله غازي وزني، اللي ما صدق مشي.
البلد محكوم بالترغيب.. وإلا بالترهيب.
“حتى الساعة التي لا ريب فيها، انا بحددها”.
انا الزعيم..
(بس هالمرة ما زبطت)
٢٨اذار ٢٠٢٣
حسن أحمد خليل
