ليش ماتوا وما تغير لبنان..؟
حدا خطب وقال الكل قدم شهداء. وبتصير القضية كأنو الكل لازم يعترف بشهداء بعض..
طيب اعترفوا واعترفتوا.. وبعدين..
شو تغير؟
مات 200الف لبناني بالحرب الاهلية..
اغتيل الزعيم كمال جنبلاط..
والسيد موسى الصدر..
والرئيس بشير الجميل..
والعشرات بالتفحيرات والاغتيالات..
والرئيس رفيق الحريري..
والسيد ح. س. ن وأخوته..
وشو تغير؟
بعدو لبنان دولة فاشلة، وشعبه اغلبه متجذر كراهية وعنصرية وتخلف.. اوعى حدا يدعي حضارة وحضارات.. تخلف ورجعية..
طيب ليش؟
لانو اللي استشهدوا وماتوا، لم يموتوا لقضية وطنية مشتركة واحدة..
كلهم حكيوا انهم عم يدافعوا عن لبنان، اللي ما يعترفوا هني وانصارهم، انو كل واحد مات عم يدافع عن لبنان من منظوره واولويته..
منهم كان منظوره لبنان من خلال منطقته وطائفته. او من منظور مصلحة ضيقة..
ومنهم كان منظوره لبنان من خلال ما هو ابعد من الحدود..
الافضل عدم الدخول في التفاصيل، لانو بيزعلوا مناصرين كل واحد منهم..
بعدهم اللبنانيي ناطرين قيادة علمانية عابرة مناطق وطوائف.. ومصالح ضيقة.. واهداف جامعة للجميع. لا خطابات وعناوين عامة فقط..
شو الدليل؟
لم يخرج على اللبنانيين بعد حزب او زعيم واحد صاحب مشروع حكم سياسي مالي اقتصادي انمائي اجتماعي..
اقصى ما يتغنى به البعض هي تجربة فؤاد شهاب من 70 سنة او اكثر..
طيب ليش؟
لان الجينية اللبنانية هي جينية ريفية او مدنية عنصرية انزوائية فوقية انانية.. اسوا من بعضهم البعض..
والحل.. عند الله..
#حسن_أحمد_خليل
