يا الله.. شو حلّ فينا..؟
يا رب هل حتريحنا من أعداء من برا.. ومن جوا..
كنا بستان وزرع ومطعم ومعمل ادوية ومستشفى ومدرسة وجامعة وسينما ومسرح ودار نشر المنطقة..
فجأة صرنا ننطر مساعدات بطانيات واغطية وادوية.
وصارت مدارسنا ومطاعمنا وساحاتنا العامة مراكز ايواء..
كنا اول من ننتفض لنسعف المحتاج بالمنطقة.. صرنا محتاجين..
عصابة نهبت وسرقت، وبعدها زلّطت الدولة والمجتمع من أدنى مقومات الكرامة..
الله يلعنكم ويلعن كراسيكم ومناصبكم والقابكم وزعاماتكم.. وكل مين بعد اليوم بيضل حمار، بيجيب سيرة اسم منكم..
دمعة وكسرة خاطر كل نازح ومتشرد وتائه اليوم، بتساوي كل قصوركم وخزائنكم اللي فيها النقدي لوقت حاجاتكم انتو..
بيكفي حكي اليوم. مش وقته..
الناس عم تدور على دواء ووين تنام وتاكل..
الحكي لبعدين.
وعارفين انكم قلقين لتنتخبوا رئيس جمهورية، وكانه بيشيل الزير من البير.
بدكن تنتخبوا بس لتحافظوا على نظامكم الوسخ متل وسخكم..
يا الله شو حلّ ببلدي وباهلي..؟
٦ ت١ ٢٠٢٤
حسن أحمد خليل
