Hassan Khalil
1 مارس 2020 ·
الله كم معبرة هذه القصة. لو يقراها الزعماء اللبنانيون. عل أحدهم يهرول الى بيت هذه الام، بقبل يديها و قدميها، ويستغفر منها لانه هو من قتل ابنها مرات عدة. ويطلب منها السماح قبل ان يحترق جسده وقلبه. حسن خليل، #تجمع_استعادة_الدولة
حقائق تدمي القلب وتعذب الروح .
عن صفحة الصديق محمود الشامي .
اليكم ما قالت أم عن موت ولدها …
كيفك ياحجه ؟
الحمد لله يا إبني..
أنا جاي عشان خبرك خبر مش حلو..
عارفة الخبر وحسيت فيه من لما دقيت ع الباب..
شوهوي ياحجه ؟
ابنى يلي بأفريقيا مات صح ؟
ايه يا حجة .. الله يعطيكي الصحة والبقية فى حياتك..
تفضل فوت اعملك شاي..
شاي شو ياحجه! عم قلك ابنك مات..
بعرف يا ابني .. ابني ميت من زمان .. بس قلي هوي كيف مات هل المرة؟
مات هل المرة !! خلص شغل ب الليل وهوي عم يسكر المحل هجموا عليه حرامية بدهم يسرقوه وقاومهم، قاموا قوصوه..
كم ملعقة سكر يا ابني؟
رح تجننيني ياحجه بس!! شو يعني، ميت من زمان، ما فهمتها؟ شو هالصبر يلي عندك وطولة البال؟
يا ابني .. ما حدا بيهرب من قدرو .. أنا عارفة انو ابني رح يموت .. بس كنت بحاول خليه جنبي اطول فترة ..
ابني مات من زمان لما اتخرج من الجامعة وما لاقى شغل ..
ومات مرة تانية لما حب وحدة وكان بيحلم يتجوزها بس ما قدر يأمن قرض ع الاسكان ليشتري شقة يعيشوا فيها لانو ما عندو واسطة..
ومات مرة لما اشتغل وايتر بمطعم واجت البنت يلي كان يحبها مع خطيبها ابن المسوؤل..
ومات كمان مرة لما ابوه مرض وما قدر يفوتو ع مستشفى منيحة.. وبعدها شال همي وهم مرضي وهو ما كان معو حق ترويقة ..
ومات مرة لما …
بس يا حجة يرضى عليكي..
معك خبر يا ابني .. آخر مرة قبل ما يسافر لما ودعتو كنت حاسة انو رح يموت .. سألني شو بك، قلتلو ما في شي بس ما لحقت اشبع منك يا ابني، قالي بشهر رمضان رح انزل وبنفطر وبنعيد سوا …
نحنا الفقرا يا ابني ما بنفرح ب العيد اكثر شي بنروح الصبح ع المقبرة وبنحسد يلي فيها لانن ارتاحوا من هيدي العيشة … الفقير يا ابني بيرتاح لما يموت، الحياة مش حلوة إلنا..
والله مش عارف شو بدي قلك ياحجه .. ع كل حال هيدا شيك ب ٥٠٠٠$ من صاحب الشركة يلي ابنك كان يشتغل عندو..
خليهم معك، بتروح بتفتش ع الشب يلي رح يتغرب بدالو واعطيه ياهن وقولو ما تحرق قلب امك مثل ما انحرق قلبي.!
