Hassan Khalil
24 ديسمبر 2022 ·
بالأعياد بيخطر عبالي دايما اسال الكل. نعم الكل.
هيدا يوم لازم يوقف كل واحد لحاله، ما معه حدا، قدام المراية.
يطلع بحاله، ويتخيل انو هو امام الله عم يحاسبه.
شو بيقول لله؟ شو بيجاوب الله لما الله يتهمه انو كذب او سرق او ظلم او ابتز او اساء امانة او استبد او تفاخر او تجبر او نام وما اطعم جائع، وما انتصر لمظلوم، او سكت عن ظلم، او كان اناني وعنصري بفترات.. او.. او… او…او راح عكنيسة واعترف.. واذنب من جديد. او راح على عمرة او لطم بعاشوراء وبكى كالطفل، ولما خلص رجع منافق.
كلنا حنطلع بلبنان مذنبين. هون بينطبق كلن يعني كلن، وانا واحد منهم.
الدليل: حالة بلدنا. مفلس منهوب مدمر مقهور مفتت مكسور.
كل واحد قدام المراية جعل من زعيمه الحرامي زعيم.
هو مذنب في تدمير بلده ومستقبل اولاده.
كل واحد بيفكر حاله له امتيازات عن غيره، لانه ولد على دين ما، مذنب.
كل واحد مذهبه اولوية على اخوه او وطنه مذنب.
انا يوم الحساب بدي اسال ربي ليش ابتلاني بولادتي ببلد لازم جاوب او اصنف كل يوم وساعة عن مذهبي، واتعامل على هالاساس، وولد بيبكي على بكاء امه وابوه لأنهما ما معهم يطعموه، ومريض ما معه ثمن دواء..
كل عام وانتم بالف خير.
ميلاد مجيد. عل المسيح والانبياء يشفعوا لنا عما فعلناه ببلدنا ولاولادنا.
#حسن_أحمد_خليل
