24 أغسطس 2021 ·
◻️بعيدا عن السياسة..
حضرة الرئيس المكلف، الحاج نجيب ميقاتي.
لا حكومة لا اعتذار.
✍️ حسن احمد خليل
▪️بس شوف مقطع فيديو للفنانة كارمن لبس كيف عم تحكي بحرقة والم وغضب ونقمة وحتى كره عن اللي عم تفاوض معهم بالأسماء، وبتعرفهم بكل جرائمهم.
▪️وشوف الفيديو اللي عم ينتشر عن اصحاب المصارف، والدعاء عليهم وعلى اولادهم.
▪️طبعا الله لا يضر بولد احد، ويحمي كل الاولاد.
▪️بس لما تروح رحلتك السنوية على الحج، شو رح تقول؟ شو رح تدعي لله، وانت عم تفاوض وتوقع وتجلس وتتعاون وتعين وتولي على الناس اللي خربوا بيوتهم. كيف بدك تفاوض مع الله على كل هالخطايا؟
▪️الدنيا يا اخ نجيب، لاننا اخوة في هذه الحياة شئنا ام ابينا ليست كلها مال وسلطة ونفوذ ووزارات.
هناك محطات فيها الموقف والكلمة تغير مصير شعوب.
▪️الناس انهتكت اعراضها. وانكشفت بيوت مستورة، ونهب جنى العمر للبعض، وتدمر مستقبل اباء، واجيال اولادهم.
▪️ارجوك، ما تطلع على التلفويون وتصرخ كالغاضب انك تريد العودة الى حياة طبيعية لتروح على المطعم.
هناك ناس فقدت الامل بالحياة. هناك رجال عم تبكي بالسر كالنساء، ونساء عم تقاوم بالعلن كالرجال كرمال أولادها.
▪️ومع كل هذا عم تالف حكومة مع هالمجرمين اللي هني ارتكبوا كل هالجرائم. وبدك تروح على الحج سنة الجاي؟
▪️اوعى يا اخ نجيب تنضم للمجموعة اللي ضربها مرض العظمة والجبروت، لدرجة انها بتعتقد اوقات انها بتفاوض وبتتشاطر حتى على الله. او ان الانبياء والرسل لم ينتهوا بمحمد، وانهم هم رسل وائمة نعمة على شعوبهم.
▪️قريبا ما عندك خيار الا بدك تواجه الله اللي بتحج لعنده كل سنة. ما فيك ساعتها تفاوض معه وتبرر له.
من يفاوض مع لصوص لتغطية جرائمهم السابقة، والاستمرار باذلال الناس، ما في بكرا يبرر لله.
▪️الله منعم عليك دنيا، ومتدين للاخرة. شو بدك بعد؟
▪️اما ان تعمل مرة خارج السياسة، وانت بتعرف اكثر منا كلنا شو لازم تعمل، او استغفر وصلي ركعتين وتوكل. الدنيا مش كلها سياسة وسلطة وجاه.
▪️اي وزارة قلت لي لمين؟
خذوا المناصب والمكاسب، بس خللونا الوطن.
#حسن_أحمد_خليل
#تجمع_استعادة_الدولة
