١ تموز ٢٠٢٥ ملاحقة “الحرة” على مقال التوتر بين عون وبري..

ملاحقة “الحرة” على مقال التوتر بين عون وبري..
. طيب ما تزعلوا.. العلاقة بين عون وبري غرام..
والعلاقة بين عون وسلام، وبري وسلام ممتازة.. كلكم عشاق..
مبسوطين..

عيب.. عيب..
قضاء فاضي يلاحق موقع إلكتروني على مقال حول خلاف على تعيينات، ومش فاضي يلاحق جرائم ضد شعب وتدمير دولة..

في خلاف. صحيح ونص..
عون اختار الحاكم وسانده بري وحعجع بالوزراء الدمى ضد سلام، القبضاي بس بحصرية السلاح.. وبعدها سلام العلماني اليساري، اخذ حصته من “البيارتة”..
عفوا، ومشغول بمسرحية “هملت” لشكسبير..
واليوم بري بدو غصب عن الكل، زاهر حمادة مدعي عام مالي، ووسيم منصوري، نائب حاكم، الملاحق قضائيا، وعلي ابرهيم القاضي الشهير، اللي “شاهد ما شفش حاجة” في ٢٠٠ مليار دولار جرائم، والا ما في تعيينات.. القبضاي يوقف بوجهه.. متل ما أعطاكم بدو ياخذ. وقعتوا متل كل اللي قبلكم بالفخ. وبيعرف نقاط ضعف كل واحد منكم.. لا عاد فيكم تتراجعوا.. ولا تتقدموا.. حذرناكم ما سمعتوا.. انها الكرسي..
هل هيدا الكلام جريمة يا قضاء اللاعدل في لبنان.؟ .
شاطرين على صحافي وما شايفين مين قاضي متلكم اشترى شقق بباريس، ولا وزير سابق ببيروت.. ولا مليارات المافيات..
كيف الله ابتلانا ننتمي لنفس البلد اللي انتو منها..
“الحرة” مش مجرمة..
المنظومة وقضاتها هم المجرمين..

١ تموز ٢٠٢٥
حسن أحمد خليل
تجمع استعادة الدولة