Hassan Khalil
30 مارس 2021 ·
يا الله. نحن مؤمنين. ليش مصرين يكفرونا
حسن أحمد خليل
رح نحكي بالدارج هالمرة. عون عنيد وقال للحريري ما فيك تعمل خروف عند الشيعة والدروز، بيعطوك اسماء وزراءهم ووزاراتهم، وعنتر بس على المسيحيين انت بتسمي وبتنقي الوزارات .
ما قدرت مرجعية مسيحية واحدة تعترض على عون، ولو بيكرهوه. برافو،برافو. هلأ المسيح ارتاح بملكوته انو المسيحية بخير، ولو انو بلبنان، ما في اثنين منهم بحبوا بعض. قام الحريري استنفر، واستنهض اهل السنة، وانو هو رئيس الحكومة، "وهو اللي يؤلف الحكومة"، وما بياخذ تعليمات من حدا. واذا احتاج في بظهره مفتي مستعد يصلي بالسرايا. ووراءه كمان نادي رؤوساء حكومة. صحيح كل واحد بيصلي يجي دوره، ويزيح الحريري، ليعمل رئيس حكومة محله، بس هلأ هني مع الحريري). هيك رجع الحريري بخطابه الفوقي من قصر بعبدا، صلاح الدين جديد، شاهر سيفه في وجه ريكاردو قلب الاسد، إلى إن تجي الفرصة ويهادنه. وان احتاج بيروح للأزهر كمان، برافو. هلأ ارتاحوا الخلفاء الراشدين والصحابة في جناتهم. كانوا ما عم يتهنوا بالجنة من ورا قلقهم على رئاسة الحكومة السنية، مع العلم انو نا في اثنين منهم بيحبوا بعض صدقا. الشيعة ما عندهم مشكلة، بس بدهم بيجيبوا الحريري، الذي استقال بضغط الشارع. وبدلوه بدياب، ليرجعوا يطفشوه لدياب، ويقنعوا الحريري ليرجع، لانو ما في بديل عن "الاعتدال السني" اللي بيمثله. عاساس دياب داعشي من انصار ابو حمزة الحفصي. والاهم حرصا على الطائفة ومستقبل وتحصين النظام المالي العالمي، الشيعة متمسكين بالمالية، اصلا مين بيتجرا يناقش بالموضوع، ولا حتى لو ضغط مجلس الامن الدولي بالموضوع، شو فهمهم بالامن القومي الشيعي، وهني من ورا سجلهم فيها، ما عاد يفكر صندوق النقد يجي علبنان، صار عم يستجدي يروح لعنده وزراء مالية شيعة. واذا انزرك تقنيا، بيجيب معه حليفه الماروني حاكم البنك المركزي، الحائز على جائزة افضل حاكم عالمي اربع مرات، لانو نجح بافلاس شعب بكامله. هيدا الحاكم الماروني حاميه شراكة زعماء ورجال دين موارنة وزعماء الشيعة والسنة معا، وبيطلع واحد بيقلك هناك من يريد ضربه ليضربوا القطاع المصرفي المسيحي، ليحل محلهم الشيعة، والشيعة حاميين الحاكم. افهم اذا بتفهم. وبيقلك "ثنائي شيعي" ، واياك تقرب على هالموضوع ولو جاعوا كل الشيعة. مش مهم. المهم شو بيشوفوا المرجعيات والزعامات الشيعة.
اما الدرزي الحمدلله مرتاح عوضعه. شريك مضارب ولو بالقليل. مين ما كان رئيس هو موجود بالكل، واذا انزركت بتعلى أخلاقه وبيبادر وبيجول وبيتنازل ليحل الامور. المهم اياك طائفة الموحدين. الطوائف الأخرى بين العمالقة ساكتين، وما عندهم خيار الا يرضوا باللي بيعطوهم اياه، لانهم غير هيك ما حدا بيرد عليهم. بهالاجواء الكل بجييشوا وبيحشدوا. انتظروا هاليومين بس تبلش فتح ملفات ما بكيدية، ويردوا الباقيين؟ الله واكبر، ويا مريم العدرا... يا غيرة الدين.
وبيجي مين يسألك شو الحل؟صحيح الله لا يرد الاغبياء الماشيين وراء الزعماء، لوين بيروحوا المظلومين والابرياء المتعلقين بحبالك يا الله؟
اغلب القضاء وبعض الامن افسد من معلميهم، الحراك الشعبي بلا اهداف ولا قيادة، وكل ٤ او ٥ بيعملولك فصيل اسمه اكبر من عدد اعضاؤهاذا صلوا المظلومين للجيش حتى ينقذهم، بيطلع مين يقلك، اوعى الجيش. بيفرط دغري لانو الاوادم مخردقينو. اصلا ليقدر الجيش، بدو دعم مال وذخيرة ما بيتأمنوا الا من برا. ومن برا شي مقبول وشي مرفوض. والمقبول ما بيعطي شي ببلاش. وبعد في ناس بسيطين بيعتقدوا انو في دول حريصة على مجد لبنان، وانو الغرب والشرق ما بيناموا بالليل قلق على المسيحيين، واهل السنة والشيعة والبوذيين كمان. لهلق ما تعلموا من تجارب الماضي، ولا تعلموا ان بلعبة الامم ما حدا بيحبك او بيكرهك، الا بقدر، مش شو بتعطيه، بل بقدر شو بياخد منك. ما سالوا حالهم إنو لو برا بدهم يساعدهم، كانوا بشحطة قلم رجفوا الكل بتجميد حساباتهم. يعني كمان لا الجيش ولا الخارج منفس.
طيب يا الله لوين بيروحوا المظلومين؟ بيدعولك تشغل عزرائيل بالظالمين. بتقوم بتطول بعمرهم، وبتحصد أبرياء. وبعدين؟بيجي واحد بيقلك سلمها ربانية. هو ملك القدر والمصير. طيب والجوعان هو عم يصبر شو بيقول لمعدة اولاده، او لاقساط مدارسهم وجامعاتهم اللي عم تهددهم بالطرد، وبيصيروا على الرصيف في العواصم العالمية تائهين وجوعانين ومشردين على الارصفة. يا الله. نحن مؤمنين. ليش مصرين يكفرونا...وينك يا رب تساعدنا نخلص منهم... #حسن_أحمد_خليل