28 اب 2024 بمناسبة الخبر عن رغبة يوسف الخليل بالاستقالة، وقبول ميقاتي ورفض بري، اعيد نشر رسالة قديمة له..

[adminArchive]

بمناسبة الخبر عن رغبة يوسف الخليل بالاستقالة، وقبول ميقاتي ورفض بري، اعيد نشر رسالة قديمة له..
وازيد عليها اليوم..

يا يوسف خليل
من ابن عمك حسن أحمد خليل.

يا يوسف. يا حبيبي. ما شفت شو عملوا بغازي وزني قبلك. تطوع وقدم الكابيتال كونترول. قاموا ضربوه على ايده وسحبه. قضى اخر ستة أشهر بالوزارة كالمومياء اللي معها انهيار عصبي. شايف ومش قادر يحكي. ندم على طموحه، وما صدق خلص.
شو عم تعمل انت اليوم.
نجيب ميقاتي طموحه أعمى فهمنا. لكن اوعى تكون قبضت انه معك "لآخر الطريق".
انت شو بدك وليش؟ .
يعني مستسهل وانت ما دخلت حكومة بحياتك، وما اشتغلت سياسة، وكنا نحكي انا واياك عن الاحزاب والمحازبين اللي دمروا البلد. مستسهل انك تكون وزير المالية اللي سيهندس ويوقع على الخطة التي ستعلن قانونية السرقات التي حصلت مدى ٣٠سنة. ستوقع على شرعنة نهب العجوز والأهل واليتيم والجار والصديق والقريب وابن الحي.. واخوك المواطن.
مستسهل بعيدا عن السياسة والطموح ان يدعو عليك لا لك ملايين الناس المنهوبة. . شو ذنب عائلتك ان تحمل وزر الادعية.
لماذا وضعت نفسك في هكذا موقع؟
وارجوك يا يوسف، وانا ما زال لدي نسخة من الندوة التي شاركت معك ومع الآن بيفاني في ال AUB، كيف كنت متقدما علينا في انتقاداتك للسياسات القائمة، وهذا كان رايك منذ ٢٨سنة، مدى معرفتي بك، ارجوك لا تخرج علينا بتبرير "المسؤولية الوطنية".
انت اليوم واجهة تغطية جرائم ال٣٠ سنة،
لماذا؟
ها هي حركة امل التي منعت شريكها في الثنائي حتى في إبداء الرأي في ترشيحك، تصدر بيانا اليوم تندد بموازنتك. اذا كانت صادقة في بيانها، فهي لا تدعم من اوكلته.
وان كانت غير صادقة في تنديدها، وهي كذلك، تتبرأ منك لتضعك في بوز المدفع.
من أجل ماذا، ولترضي من في آخر مرحلة من حياتك المهنية؟
وكيف ستعيش حياة طبيعية بعدها في وسطك، وانت من ستنظر اليه العيون انه مهندس المآسي. ومن وضعك في الواجهة سينفضون يدهم عنك كورقة الشجر اليابسة في فصل الخريف.
صدقا ااسف لك ومن أجلك يا يوسف.
واكرر السؤال من أجل من، ولماذا؟
#حسن_أحمد_خليل
#تجمع_استعادة_الدولة

واليوم اكتب له مجددا..

اشاعة..
يوسف الخليل استقال؟؟
كلمة بالمباشر يا ابن عمي.

ما بعرف اذا صحيح ام لا انك استقلت؟
لكن كان لازم تعرف يوم لما قبلت تعيينك من اللي عينوك ان هيك حيكون وضعك..

يعني صحيح انو قرارك انت "تفوت" ، بس ما بيعود قرارك "تطلع".. ولو.. شفت شو صار بسلفك لما حكي عن مشروع كابيتال كونترول. ومرة شو صار فيك بخطابك في المجلس من قبل اللي عينك ورئيسك الحكومي متشاركين..
سلامة فهمك..
ما فيك يا ابن عمي تستقيل وتمشي بدون إذن. والمعلم ما رح يعطيك الاذن.. لكن فيك تقرر انت إذا ما عليك ممسك...
صورتك وكلامك على التلفزيون ما بيطمنوا عن وضعك النفسي.. وبيوحي انك فعلا راغب تستقيل.. واضح انك مرتبك!! رأيي تمارض..

وكلمة بالمباشر للي عينوك.
يا جماعة. ما بترحموا ولا بتخلوا رحمة الله تنزل.
الزلمي واضح شبه منهارة اعصابه، متل ما انهارت اعصاب اللي قبله.
ارحموه.. وخلوه يمشي، وخلاص، يستلم الوزير الفعلي النابغة، خاصة انو مستشاريه وصحافته حاضرين اصلا.
وما حدا حيعترض.. ما الكل اصلا زاحف باتجاهكم.. مبروك..
عن جدْ. نرفع لكم القبعة.. انتو بشهادة الحلفاء والخصوم ارباب السياسة.. على الطريقة اللبنانية..

شو يا صفية.. شفتك عم تضحكي. معك حق تضحكي..
ما فيش فايدة..

حسن أحمد خليل