بعد كل اللي حصل
نحكي بصراحة، وما حدا يزعل.. وحنضحك.
بعد كل اللي حصل من سرقة وخراب غير مسبوقين:
~شاب حبوب ماروني بيقول لي، يا خيي خلاص. نحن بدنا نعيش لوحدنا.
واعطاني محاضرة عن تميز الموارنة، ولما كانوا فعلا حاكمين، لبنان كيف كان.
يعني نفض ايدهم من اي مسؤولية. ونسي ان اكثر زعامات الموارنة، انشرت من جوا ومن برا حسب الزمن والسعر.
~ وبعشاء دعوة من عائلة كريمة بتقول دايما ما في فرق، ونتجنب نحكي سياسة، الا ما يتم لطش ان السنة مكسور جناحهم، والمشكلة كلها “هيدا اللي بيرفع اصبعه، وسلاحه”.
يعني مش هني مترأسين حكومات من ٤٣ لليوم، والزعيم السني اللي رسخ فساد الليرة الى دولار، والالف الى مليون، واشترى الكل، ووزع الحصص، وعين حاكم المركزي امين صندوق. وقلب الفساد من ممارسة الى إرث وثقافة. لا ما خصهم..
~ وبيحكيك واحد شيعي بتهديد مبطن: شو هيأتك عم تطلع من جلدك”. اوعى. ما لك الا اهلك، وانت استاذنا.
ويحاضر علي انو الثنائي هو اللي حرر وحافظ على لبنان.
صحيح الحركة” عملت وسوت، وما خلت، ولا بقت”. بس شو بنعمل. بدنا نطول بالنا، لانو المؤامرة علينا كبيرة.
لما تناقشه ان ما في دخل للمؤامرة في ان الحركة وموتسيكلاتها صارت رمز للتهديد والبلطجة، وانها نخرت الدولة،وهلكت ربها وخزينتها، وان الحزب حليفها ساكت، وما بيفتح سبرة المظلومية في لبنان، كما المظلومية بغير دول، اللي رافع شعار الدفاع عنها. وان ما في حل الا بحكومات الاحزاب الفاسدة. وان سمعة الحزب تشوهت لدرجة انو فتح باب الاتهام عليه بالمشاركة، وانو هو مغطي الكل، وحاكم الدولة.
ولما تناقشه ان نجاح المقا. و. مة يقابله فشل ذريع بالاعلام، بينتفض وبيقلك: ليك. احكوا اللي بدكم. نحن هيك،وما رح نرجع لورا. وحنطلع نواب الحركة قبل الحزب. واللي ما عجبه يشرب البحر، او يدق راسه بالحيط.
شو بنكمل على الدرزي والارمني، وشكوى المسكنة انهم اقليات، وكمان مكسور جناحهم.
طلعت انا، وجارنا فادي، اصل البلاء.
عفوا نسيت. فادي ارثوذكسي. كمان ما خصه.
خلاص يا عمي. الحق علي كله.
الله علي كنت علماني. قرفتوني الاديان والمذاهب.
انتو اشكوا لله تبعكم
وانا حاشكي لله تبعي.
وانتو خذوا لبنانكم. صحتين.وانا سابكي كل يوم على لبناني.
بس رجاء اسمحوا لي كلمة بعد بس:
ارحموني بهالكم سنة الباقيين من العمر الفاني.
ما عاد يبعث لي حدا كل يوم على الواتساب اقوال للرسول وعمر وعلي والائمة والمسيح وشربل وجمعة مباركة ومعايدة.
يا خيي تعبتوه لله وتعبتونا. ريحوه شوية وريحونا..
خلصنا بقى…
قال بلد حضاري قال..وملتقى الحضارات والاديان ومجد لبنان…
يا عين..
نرجع ننام. بركي كنت عم احلم كل هالمصايب..
حسن أحمد خليل
