١٦ ت١ ٢٠٢٤ *هل الله مدعو الى القمة الروحية..؟*

*هل الله مدعو الى القمة الروحية..؟*

يقال انو في قمة روحية استثنائية…
*بحثت عن اسم الله بين المدعوين، ما لقيته..*
هل هيدا معقول؟ معقول ونص..
اصلا، لو دعيتوه. فكركم حيلبي الدعوة، وانتو بعتوه من سنين وباعيتم الشياطين؟

*”الله” الوحيد اللي عبدتوه وانتفضتوا للدفاع عن مقدساته، واستنفرتوا القضاء وكل محطاتكم التلفزيونية وكتبة البلاط، وارباب المال من اجله، هو إله اسمه رياض سلامة..*
هذا هو “الله” اللي عبدتوه جميعكم. انتو والزعماء اللي كنتو لاصقين فيهم..

*مين منكم يا اصحاب النيافة والسماحة مش ملتصق بمجموعة اللي مصوا دم هالدولة، اللي حتى لما وقعت الكارثة، طلعت الدولة ما عندها خيمة واحدة، تنصبها لأب مكسور الخاطر، حاضن زوجته واولاده تحت شادر، ربطه بين حديد سيارته المكركعة وعامود الكهرباء اللي ما فيه كهرباء..*
دولة ما عندها حفاضات، ولا حليب لطفل رضبع بردان جوعان بيبكي، وامه ما عندها حل إلا تهز شرشفه المهتري..
*وجايين يا متلبسين اسم “الله” تعملوا قمة روحية؟وين الله بيناتكن وقت اللي كل واحد محتار كيف بدو يرضي زعيم الطائفة الاقوى كل مرة؟*

على شو مجتمعين اليوم؟
لتستنكروا تقصير الدولة، والتنديد بالعدوان على المواطنين العزل؟
*انتو الدولة. انتو والزعماء، اللي عملتوهم قديسين، وتسترضوهم كل يوم لتبقوا بمراكزكم، الدولة.*
الزعماء المسيحيين والسنة والشيعة والدروز واحد واحد، هني الدولة.. ومتلكم بيتذاكوا وبينددوا، بتقصير الدولة..

بالرغم ما حصل لشعبنا، وسرقة مال الدولة والناس، وبعد العدوان والكارثة، بعدهم الزعماء يا سيدنا ويا سماحتك، ما تغيروا..
*منهم كذا واحد بعدهم طامحين لرئاسة جمهورية، وما نشف بين اسنانهم دم اللي قتلوهم من اولاد طائفتهم، وطائفة غيرهم.*
*ومنهم عينه يضلو رئيس حكومة، وما شبع لا مال ولا سلطة.*
*ومنهم بعدو مفكر انو الناس ما بتعرف انو هو المهندس والمشرف والموزع والرافع والخافض والقامع والقائم على تدمير الدولة والمجتمع، بعد ال 30 سنة اللي قضاها برئاسة المجلس. والانكى انو صار مقتنع انو مخلد، او انو هو احد الائمة، او حتى خلوه يصدق انو نبي..*
واخرهم واحد قاعد على راس طائفته لحفيد الحفيد الحفيد وغاسل دماغهم شو ما صار فيهم..

*متل ما بنقول للزعماء، حنقول للقمة الروحية.. “الله” تبعكم وتبع الزعماء قديسينكم، غير الله تبعنا.. نحن الله تبعنا بالسماء ورب الكون اللامتناهي بلا حدود.. انتو “الله” تبعكم وتبع الزعماء القاعدين على قلوبنا غصب عنا، هو هيدا اللي قاعد بمركز قوى الامن الداخلي في زنزانته على السطح.، وحدودها حيطان وشبك.*
لا بد الله تبعنا يوما ما حينتقم من كل اللي كفروا فيه وتبعوه “الله” غيره..

قال قمة روحية قال؟؟؟ طلعتوا ارواح العالم..

١٦ ت١ ٢٠٢٤
حسن أحمد خليل