دايما متشائم؟
اللي بيعرفوني، بيعرفوا انو مرح بضلني اضحك..
وبمارس هواياتي بشغف..
والحمدلله عيلتي هي الأساس وبخير..
إذن مش طبيعتي التشاؤم..
طيب ليش بكتب كل يوم متشائم؟
لانو بلدي تعيس؟.. كيف؟
في كل دول العالم في:
زعران واوادم… وفي كاذبين صادقين… وفي طائفيين عنصريين، وعلمانيين.. . وفي بسيطين واذكياء… وفي عامة مضللة ونخبة مشتة… وفي اشرار واخيار.. وفي مقيمين سكرانين مأسورين، ومهاجرين هاربين مستغنيين..
وفي سفلة حقيرين وطيبيين انقياء… وفي عبيد واحرار… وفي مذلولين واعزاء كرماء ..
بس ببلدي الزعران والكذابين والطائفيين العنصريين والمضللين والاشرار والسفلة والعبيد والمذلولين، اكثر بكثير بكثير بكثير.. وعم يزيدوا كل سنة..حسن
كل بلاد العالم تختار تتقدم. بلدي بيختار يتخلف..
السياسيين الحقيرين عارفين كل الحقيقة.. وهني بيشجعوا هالهجرة.. المهم يفوت مصاري ويسرقوا او يشحذوا، وما يتغير شيء..
ودول برا عارفين البير وغطاه. واخر همهم اللبنانيين. المهم يضل لبنان تحت السيطرة..
متشائم ونص..
وحضل متشائم على لبنان لغاية ما يخلص التشاؤم من تشاؤمي… ويبطل في غبي ببيروت والقارات الستة، يحكي ب”نحن المسيحيين” و”السنة”.. وانتو “الشيعة”..
فشة خلق.. معليش..
بكرا بنرجع عالجد..
سمعتوا عن اللجان المشتركة والسرية المصرفية وهيكلة المصارف؟ ما شفتوا شيء بعد.
ولتشوفوا العجب برجب..
ودائع ما حتشوفوا..
ومحاسبة ما في..
وترقيع مستمر..
بس في عهد جديد وحكومة جديدة؟؟
غطيني يا صفية.. خليني ساكت.. بكرا التفاصيل.. هلق وين الغذاء اليوم؟
١٧ نيسان ٢٠٢٥
حسن أحمد خليل
تجمع استعادة الدولة
