20 يوليو · 2023
ما تخافوا من سعر الصرف!!
ما تخافوا لانكم اكلتوا الضرب، وخلصتوا.
لما يطلع من 1،500 الى 140الف وينزل لحوالي ال100،000، يعني المؤامرة والسرقة حصلت. يعني ليرتك خسرت حوالي 98٪. من قيمتها.
يعني وين ما وصل من هون ورايح صار رمزي، عم تخسر من ال2٪ المتبقية، مش ذات تاثير.
ماذا عن معاشات القطاع العام؟
مثلا: موظف دولة كان معاشه الف دولار على سعر 1500.
وصار اليوم معاشه 40 دولار على 100الف.
شو بيتأثر اذا صار 20دولار؟
صيرفة كانت وما زالت اداة لسرقة موصوفة، يدفع منها لشراء سكوت بعض موظفي القطاع العام ب 100 إلى 270 دولار شهريا، والباقي توزيعات على الازلام والاحزاب والخبراء الماجورين.
وكل خسارتها عم يزيدها اللي مغادرنا، وتضاف للصندوق الاسود، اللي مرجح خسائره مش 72مليار دولار، بل اكثر بكثير.
الخبراء الماجورين منتفضين على وسائل الاعلام للتهويل بخطر الغاء صيرفة على سعر الصرف. ووقحين ورخيصين، هني والسياسيبن اربابهم،عم يروجوا للتمديد..
ما تصدقوهم.
كما ما تصدقوا مين ما وعدكم بالودائع.
الليرة اداة وهم وسراب، عشتم فيه بكذب ورشوة من النظام..كلف فوق ال60مليار دولار.
الحل لها؟
بدكم سعر الليرة والودائع؟ ما بيرجعوا اذا تاقلمتم مع الوضع، “والمطاعم مليانة والسهرات مولعة”. ليش في حدا حيتحمس لكم وقت بيشوف الناس تاقلمت.
في امل يرجع جزء، اذا فيه شعب ياخذ مصيره بيده، ويواجه نهج النظام بكامله، والقائمين عليه..
مش شعب نسي كل شيء، وناطر رئيس يمثل “مجد لبنان”، بمباركة المحرومين واهل السنة والموحدين وكل المتاجرين بالله في السماء، لينهشوا على الارض.
وإلا؟ انتو احرار..
غطيني يا صفية. بدي نام. ولما فيق ارجعي غطيني لارجع نام..
