سؤال بسيط صباح كل يوم
لو وقفت على المراية وحكيت مع حالك.. وسالت.
مين انا؟ هل كانت ولادتي قراري؟
هل انا اخترت اسمي علي او عمر او مارون او معروف، او منطقتي؟
هل انا اخترت كون على هالدين او المذهب او من هالضيعة او المدينة او البلد؟
كل الاجوبة حتكون طبعا لا..
اذن يا ابن الحلال، على شو من يوم اللي خلقت، شايف حالك.
كل يوم بتحاضر علينا بمجد الموارنة او انو الارثوذكس هني المسيحيين الصح. اوبتنزل على موتوسيكلات التشبيح بتقلق راس الناس بصريخك شيعة شيعة وسيف الامام علي. او ما بتقبل الا انو النبي اشرف الانبياء وسنته هي الصح وبس.
او انو الموحدين هني جماعة عندهم “العقل” وحدهم، ..
بس اشرح لي بحياة ربك وملايكتك، كيف بتفتخر لهالدرجة باشياء وميزات انت اصلا ما لك علاقة باختيارها ولا إنجازها.
يعني لو خلقت هندوسي حتكون نفس الشيء..
وبالنهاية الكل رايح على جورة مترين بنص متر..
اذن على شو هالعنطزة والغرور والكراهية لغيرك.. وانت وغيرك بدايتك نطفة.. ونهايتك جيفة طالعة ريحتها وبياكلها الدود. متل ما كنت تاكل غيرك انت وحي..
عجيب…
والله عجيب يا بني آدم..
٤ نوفمبر ٢٠٢٤
حسن أحمد خليل
