18 مارس · 2023
مين اختلس من مين؟
سلامة قال كان فيه عمولات، بس مش الدولة دفعت. قال المصارف دفعت.
بس ما قال ليش الاموال مرقت من مقاصة المركزي.
المصارف بتقول هي ما دفعت، ومش سامعة بشركة Forey ولا برجا سلامة؟
اذن مين دفع لرجا ول Forey ؟
وليش رجا قبض؟
هي الخبرية بتنزل نظام.
تماما متل اخر ٣٥ سنة في لبنان. مع فرق:
عادة فيه سرقة بس ما في سارق.
هالمرة اللبناني عم يعترف انو فيه سارق، بس ما في سرقة..
وبتقولوا مش شاطر!!!
شاطر ونص؟
على الاقل استطاع بسبب الملاحقة الاوروبية، يحيد الانتباهات كلها من سرقة الجمل كله، الى سرقة اذن الجمل.
يا جماعة الهبرة سرقة جوا مش برا..
٣٣٨مليون لا شيء يذكر.. عم يحيدوا انتباهكم عن المليارات.
الحلو واهضم شيء انو القاضي اللبناني، كان وكأنه المحامي عن المتهم، امام القاضي الفرنسي. انتفض للسيادة..
يا عمي انتفض للسيادة..
سيادة دولة الاحتيال والسرقة والنهب..
بتقولوا ما فيه وطنية..
تفضلوا!!!
وطنية ونص:
إسلاميا لا يثبت فعل الزنا الا بتمرير الخيط بين الرجل والمرأة. اصلا ما حدا شاف فعل فاحش بلبنان. بس برا شافوا الفاحشة، وقتها الداخل صار عنده شك. بس ما حدا قادر يمرق خيط ليبرهن الزنى.
ومسيحيا، شو المشكلة؟ بكرا بيعترف الزلمي، وتمحى الذنوب.
يا عمي رياض. مرجعيتك مسامحتك حتى بدون ما تقعد على كرسي الإعتراف.
وحدة وطنية ونص..
انشالله ما بكرا يطلع الحكم الاوروبي انه الصفقات كانت عمليات تجارية خاصة.
وحتى تهرب ضريبي غير ثابت وشأن لبناني. وبالتالي لا صلاحية للقضاء الاوروبي.
يحيا العدل..
١٨اذار ٢٠٢٣
حسن أحمد خليل
