يا صفية. فايقة؟
شايفة وين صاروا الناس بلبنان؟
شايفة كيف بعد كل الجرائم والدم والسرقات بعدها الزعامات المارونية والشيعية والدرزية والسنية هي ذاتها.. واقوى من قبل..
والانكى انو اليوم، كل زعيم بطائفته يعتبر هو المنقذ لها في وجه “الوحوش” في الطوائف الأخرى…
ويا ويلك اذا بتحكي على اي واحد.. بينطوا عليك اولاد الطائفة انو مش وقتها.. الطائفة بخطر.. كلهم هيك..
عصابة غير موصوفة ومسبوقة.. المخطوفين بيدافعوا عنهم..
شايفة كيف عايشين اللبنانيي .. كل يوم بيومه..
وشايفة كيف ما في شيء بيهزهم؟ لا سرقتهم ولا نهبهم ولا تدمير دولته ومستقبل اولادهم..
شايفة كيف ما عادوا يقرأوا.. واللي بيقرأوا مش ضرورة يفهموا.. واذا فهم البعض منهم مستقيلين او مخدرين او لا مكثرثين.. مشغولين بمقهى ومطعم وسلام وكلام وشكوى ونق على غيرهم..
وبعض اللي بيفهموا اسرى عصبية وعنصرية وكراهية، ولو كان اللي سبب خسارته كل شيء من طائفته نفسها.. يعني عندهم غريزة حيوانية..
يا صفية. حالة اللبناني مبكية.. ميؤوسة..
وبيجي كم واحد بيسالك شو الحل ووين مصرياتنا؟
٣١ تشرين الأول ٢٠٢٥
حسن أحمد خليل
