14 سبتمبر · 2023
(بمناسبة زيارة لودريان مجددا، اعيد النشر، مع بعض التعديل الطفيف)
اسرار خاصة للسيد لو دريان، المش دريان..
ليصير دريان.
بطاركة منهم دريان كتير. ومفتيين، منهم ايضا دريان وقبلان..
وزعماء وفراعنة وزلم وازلام…
وعجقة وهجقة ورجقة…
دولة بكاملها منتفضة.
خير، شو في؟
قالوا في موفد اسمه لودريان..
وما عدنا نعرف مين دريان ومين عرفان، ومش عرفان، ومين حردان ومين زعلان ومين قبلان ومين قرفان..
يا سيد لودريان.. حكيناك وما سمعت..
انت مش دريان انو هولي تشاطروا على باريس ١و٢و٣ اللي امنهم رئيسك الراحل شيراك.. وسرقوا المصريات، وركبوا ديون.. ولو عملوا باريس ١٠، لنهبوه.
ومش دريان يا مسيو لو دريان، الله لطف برئيسك الحالي ماكرون، انو ما غطس ب مؤتمر سيدر ال١١مليار.. كانوا نهبوه، ونهبوا سلالة ماكرون ونهبوه المليارات.
كذبوا على كل رؤساءك السابقين انو فرنسا امهم الحنونة.
بيمدحوا باللي بيدفع.
هل سالت مسيو لودريان شو حكي عنهم الامير محمد بن سلمان، وعن ضياع ١٧ مليار دولار عليهم.. وسالت عن مدحهم بقطر والقطر..
مش دريان يا مسيو لو دريان، ان هؤلاء، قرّفوا الكرة الارضية منهم، وكعّوا امة محمد وعيسى.. حتى على الله حرابيق. بيتاجروا بالله، المفترض ممثلينه على الأرض، المتنكرين بثياب رجال دين .. الله وكيلك.. 18 ممثل له. كل يوم قداس وعظة وصلاة جوامع ومجالس حسينية، وبيزيد الفقر والانتحار والهجرة والبؤس.. وبعدهم ما اتفقوا على الله.. بينافقوا عليه. ما بيعرفوه.. شو متأمل منهم اذا حرابيق عليه..
يا سيد لو دريان ومش دريان.
يا اخي متل ما عم تسمعهم، وشكلك قرفان، وانت دريان. صار بعضهم شايفين حالهم عليك..
هل دريان ليش؟
لان ما في صوت دنانير منك. بس مشاوير..
اسمعنا كمان واضحك.. وبركي بتصير دريان:
نحن المنتفضين عليهم ما بدنا اياك، لا انت ولا غيرك يحل الوضع، ولا يصالحهم.
بدنا اياهم يضلوا متخانقين..
هولي متل القرود.. اذا تصالحوا بياكلوا كل محصول الموز وشو ما طلع بايدهم..
انت مش دريان يا مسيو لو دريان انو ولا واحد منهم بيفتح ملف واحد تاني، وبنفس الوقت، بيدعوا بدهم سيادة ودولة..
ملف واحد بس..
وشو ما حكيت عنهم، وعن زوجاتهم وعائلاتهم وازلامهم، حتى ما نقول شيء تاني، بيقولوا عم تشتي.
هولي، اكثرهم يا مسيو لودريان، جوعان وفجعان. وما بيشبعوا..
كان الله الاوحد عندهم رياض سلامة، وبيعبدوا الدولار والكرسي..
اصلا انت فكرك هني متخانقين على مبادئ؟ هولي ما بيعرفوا يهجوا او يكتبوا الكلمة.. هولي عصابات ومافيات، متخانقين على النفوذ والحصص..
بس يا سيد لو دريان، لازم تكون دريان ان الشعب صار دريان، وزبلهم.. الا لحيسة الصحون.. الشعب ما عاد يهمه.. بدل الكهرباء والمياه، جاب مولدات وشمس وسيتيرنات.
بدل الليرة، جاب دولار.. وبدل البنك، جاب شنطة. وبدل سيرتهم ووجوههم، راحوا الناس على المطاعم والمقاهي والمسابح
اتكل على الله يا سيد لو دريان..
وروح على وظيفتك الجديدة..
الموفد الوحيد اللي بيحلها بلبنان, هو اذا الله رجع وقرر يبعث نبي جديد…
بس انتبه. مش اكيد بينجح.. هولي أسوأ من يوضاس وبني قريش..
رح خلي الشعب اللي عم يقرا يتحزر مين الوحيد اللي اكيد بيحلها..
٢٢ حزيران ٢٠٢٣
تعديل ١٤ ايلول ٢٠٢٣
#حسن_أحمد_خليل
