٤ حزيران ٢٠٢٤ فتحية وصفية.. بشرفكم. ليش لازم انتخاب رئيس..

فتحية وصفية.. بشرفكم. ليش لازم انتخاب رئيس..
بلا رئيس..
وبلا حكومة تصريف اعمال.. او تصريف مجارير..
سكروا المجلس النيابي.. اصلا تشريع او بلا تشريع مين عم يطبق شيء. الكل مادين اجريهم من الطاقة
ومن الشباك.. مختلفين ومتفقين على ان يختلفوا ليضلوا..

الامن ممسوك.. بيكفي..
في بوسطة.. وفي سواق واحد ومعاون..
رئيس واحد، ومعه رئيس معاون.. ومعهم الاجهزة كلها .. قضاء وأمن.
دوائر حكومية مسكرة وبتفتح عالطلب، ولو فيها تجيب مليارات.. “وحرس وطني” بالزواريب جاهز..
وبعد في ماروني “من النوابغ” بيحكي عن السيادة وهو سجله بينقط دم احمر ودولار اخضر، عم يطالب بالسيادة شرط يجيبوه رئيس، او يجيبوه اللي هو بدو اياه.. ولو زحف عندهم.. “المهم “أنا” او من جماعتي يصير رئيس”..
والرئيس الفعلي عم يحكم. وعم يتفرج، وبيلعبهم شكر بكر.. وكلهم اما بامره، او مستقتلين يصيروا بامره.. والباقيين عم يبلعطوا.. ولا بيتجمعوا..
والبلد ماشي..
وموفد جاي وموفد رايح..
واحد دريان ومش دريان.. وخماسية مش دريانة.. والناس من التلوث جريان..

وقال شو.. الودائع محفوظة..فرفشي يا فتحية..
وعم يبحثوا بعدهم اقرار كابيتال كونترول.. شو اخبار التدقيق والفاريز؟؟واحلى شيء هو الحوار. وتعوا نتفاهم.. قابرينو سوا.. ومدخنين اركيلة عل. قبره..
قومي نامي يا صفية.. وعمرك ما تتغطي..

٤ حزيران ٢٠٢٤
حسن أحمد خليل