٣ نوفمبر ٢٠٢٤ معليش ما تزعل مني هالايام..

معليش ما تزعل مني هالايام..
هالايام ما عندي رغبة اسمع عن عجيبة لمار شربل..
ولا حديث شريف للنبي..
ولا الاف الاقوال عن الامام علي او جعفر الصادق..
خففوا الواتسابات على المجموعات.. واخبرونا..
هالايام بدي اسمع كم حصة غذائية وصل، وكم قنينة حليب اطفال وحفاضات لاطقال رضع.. مش 3 وزراء بيطلعوا ليستقبلوا طيارة..
وكم بطانية وفرشة عم يتأمن قبل الشتاء..
هالايام حدا يحكي لي عن جبر خاطر رب عائلة مكسور خاطره..
وعن مواساة ام متل الحجة بالحمرا اللي بثقة وقفت ودمعت في عينها، وصرخت بوجه الكاميرا انو هي مش عم تستجدي. هي ابنة عز، لكن راح بيتها..

اللي بيوقف مع اولاد بلده المقهور بهالمحنة، انا بتحمل وزره عند ربه، انو كانه صلى وحج وصام وزكى في كل لحظة، وكانه حضر خطبة جمعة بجامع وعظة احد بكنيسة..

“ووجدك ضالا فهدى ووجدك عائلا فاغنى فاما اليتيم فلا تقهر واما السائل فلا تنهر واما بنعمة ربك فحدث”..

٣ نوفمبر ٢٠٢٤
حسن أحمد خليل