خطابات وخطابات..
يا دولة الرئيس… يجب ولازم وبدنا ووين صار..
وكأنو ما بيكفينا الاخطار من الخارج من اعتداءات على الحدود ومن تهديدات بعقوبات، لمهزلة الجلسات النيابية من احزاب خاطفين البلد وشعبه. غاسلين دماغ كتار، وبيهددوا الباقيين بكل مفاصل حياتهم..
من يوم اللي نائب صرخ بصوت جهوري وقال له يادولة الرئيس لو فتحت ملفات حتسقط رؤوس كبيرة..
لليوم نواب بيطالبوا بتطبيق رفع السرية المصرفية واستكمال التدقيق الجنائي وملف التحويلات واوبتيموم وووو. واصلاح القضاء؟؟ ؟
ودولة الرئيس بيهز براسه.. وبيوافق وكأنو صار شريك مع الخطيب بالشكوى..
وبيقول المجلس النيابي عم يقوم بمهمته وبيقر كل القوانين. وما في ولت قانون بالدرج ولا مادة اجرها من الشباك.. وانو المشكلة بالمراسيم التطبيقية..
قاموا البعض بهجوم على نائب لانو قال للحكومة الله يعينك على هالمجلس.. كلهم قاموا عليه وانهم عم يشتغلوا.. وبيشرعوا قوانين صاروا 77..
يا سلام.. مجلس نيابي مش مقصر. طلعت المشكلة بالحكومات. بس هي الحكومات هي اللي المجلس النيابي بيعطيها الثقة. والحكومات بيشكوا من عدم تنفيذ القرارات اللي بتصدرها بدوائر الدولة والقضاء..
والحلو كل الاحزاب والزعامات بيشكوا من القضاء. وصالونات كل واحد منهم او تلفوناته ما بتفضى من حصته من القضاة اللي بياخذوا اوامر منه..
يا سلام شو هالمسرحية..
يا دولة الرئيس..
يا دولة الرئيس..
خلص ليجي دورك بتحكي..
خلاص يا…
قعود يا…
وبيهز براسه وبيشكي معهم وكأنو ما خصه..
ممثلين دراما او كوميديا على مسرح او
في فيلم سينما او مسلسل اسبوعي..
عم بيسالوا وبيخاطبوا اللي تراس المجالس من ال93 لليوم. ومررت كل الموازنات والعجوزات.. والمعترضين القلة مقموعين..
وبيمرق بدون تصويت فعلي اللي له فيه رغبة يمر..
يعني هالنواب الجهابذة اللي طلعوا البارحة وحكيوا عن كل الفضايح ما بيعرفوا مين وراءها.
ما بيعرفوا مين حمى رياض سلامة وتوزيعه متل بابا نويل ال 80 مليار دولار. ما بيعرفوا مين اوقف الكابيتال كونترول والسرية المصرفية. ومين في بملف اوبتيموم ومين حول واستفاد وما زال. ومين ورا صيرفة؟؟؟
ومين ماسك القضاء وووو..
ولازم نتفاءل بالحكومة ونعطيها فرصة.. ليش؟ لانو وزراءها مميزين؟ طيب بنرجع نذكّر.. هل ما تالفت متل قبل، ونسبيا على اساس محاصصة. امل اشتراكي قوات وكتائب. الفرق عزلوا التيار والمردة واخذوا حصص كل الاحزاب السنية. لس بعدها احزاب وطوائف..
اسالوا هالحكومة مثلا بكرا مين بدو يقترح اسماء لحاكمية البنك المركزي الماروني ونوابه الشيعي والسني والدرزي والارمني.
مين بدو يقترح اسم بدل للمدعي العام المالي وشواغر مجلس القضاء الاعلى.. او محل مدعي عام استئناف حبل لبنان. .. او اعضاء المجلس الدستوري؟ كيف حتصير التشكيلات الدبلوماسية؟ لو فيي قول شو قال لي الوزير عبدالله بو حبيب.. هل سمعتوا عن الأسماء المتداولة؟
مين بدو يقترح اسم لانترا والتمويل. او للضمان او لكل المراكز؟ الوزراء مثلا؟
هل ممكن ان يتم اقتراح شخص لاي مركز بيستفز زعيم الطائفة الماروني والسني والشيعي والدرزي، اصحاب ووكلاء المراكز والمناصب في هالنظام الطائفي البشع المقيت المقرف..
تيتي تيتي متل ما رحتي متل ما جيتي..
وفي ناس ناطرين الانتخابات. يعني حيرجعوا بعض النواب اللي صار لهم من 30 سنة وجاي.. ولا كأنو البلد تعرض لكارثة.
بس انتبهوا..
كلهم بدهم إصلاح.. وبدات التحالفات للانتخابات..
ويا دولة الرئيس
يا دولة الرئيس..
ذكروني لما دولة الرئيس عرقل انشاء بنك للفقراء ايام كنت برفقة الامير طلال بن عبد العزيز. قلت للامير يومها، منيح اللي عرقل مشروع بنك الفقراء.. لو عملناه كان راح البنك وضلوا الفقراء..
واليوم يا دولة الرئيس.. في رئيس بس ما في دولة..
وتخبزوا بالافراح..
حيقول البعض. يا اخي هيدا الموجود. احسن من قبل..
العمى شو هالتشاؤم؟ ؟
لا ما رح اتفاءل معكم. ولو كنت لوحدي..
وانا بكون كتير مبسوط اذا طلعتوا انتو صح وانا غلط..
بس في اشياء واضحة من جوا قبل برا ومن برا قبل جوا، بتقول لي ليش ما فيي اتفاءل..
وهالمرة ما حنقول شو الحل وشو لازم وشو البديل. ما نفع وما حينفع الحكي..
وقت هالمسرحية ماشية وما في الا اصوات اعتراض قليلة جدا.. ليش الاقتراح؟
وقت اللي اللبنانيي بيتابعوا بعشرات ومئات الالاف فضيحة تقاتل 2 مدراء بالدولة على علاقة غرامية، وما بيتابعوا الا قلة قليلة ما فصلناه عن تجاهل البيان الوزاري لكل السرقات والملاحقات. مبروك على اللبنانيي.. يخبزوا بالافراح..
