بيني وبينك يا الله..
ويا الله سامحني..
ما عاد ينفع الكتابة بالتفاهات اليومية للحياة البشرية..
سامحني لاني صرت عم دور عن الله ثاني اشكي له عليك..
ويا الله صرت عم اسال ليش انا وصلت لحالة، تخليني ابحث عن الله ثاني. لأنو من وقت اللي خلقت ما شفت على هالكرة الارضية الا ظلم وقتل.. وانو الظالم هو اللي بيربح دوما..
قرات التاريخ. لقيته ابشع من الحاضر. من ايام ادم وحواء، الشرير قابيل قتل الادمي هابيل. هل لذلك فيه كلمة وصف الاهبل؟
وبعدها من زمن الحضارات كلها قتل وقتل وقتل وطمع وشجع وظلم..
هل معقول نصدق انك خلقتنا لتجربنا كيف نتعامل مع الظلم والظالمين؟ طيب مش كان اريح لك واريح لنا، نحن البشر الضعفاء المساكين، لو ما خلقت الظلم اصلا. وكنا كلنا طيبين اوادم..
وليش خليت كل الاديان وناسها تفكر انهم المفضلين عندك.. يعني ليش عززت المنافسة والغيرة والكراهيةبين خلقك؟
وبعدين ليش قلت لنا ان نحن خير امة أخرجت للناس تامر بالمعروف وتنهي عن المنكر، بينما طلعنا
اسوا امة أخرجت للناس تامر بالمنكر وتنهي عن المعروف.
ليش؟
سامحني يا رب.. بس باحلف فيك انو لازم تفهمني، وما تزعل مني، وما تعاقبني. انا مخلوق عقلي بسيط ومحدود، وخائف وتائه ومحتار في حياتي… وانو انا طبيعي اسال ليش انت خلقت الدنيا هيك، وليش مش عم نخلص من الظلم والظلام.. وليش من يوم الخلق، المؤمنن فيك مضروب حزين خسران، والكافر السفاح غنيوا بيضحك وربحان.. وليش الوفي الصادق حزين دوما، وخائب، والخائن الكاذب المتآمر العنصري الجاحد الحقود، مبسوط ومرتاح..
طبعا حيكفرنا البعض، ويقرا علينا من الكتب السماوية ما يسكتنا..
يا ربي احمني من جهلهم.. الجهل اكثر شي بيخيفني.. انا مش خيفان منك، ومطمئن انو لن تغضب.. انت العفو الغفور..
خلاص أمركم .. سكتت.. بس عقلي حيضل يفكر..
مليون ليش؟؟
١٥ آب ٢٠٢٥
حسن أحمد خليل
