١ ديسمبر ٢٠٢٥ قداسة البابا.. حنزعجك هالرحلة.. طول بالك..

قداسة البابا..
حنزعجك هالرحلة..
طول بالك..

متل ما توقعنا نخرتنا التلفزيونات عن الوجود المسيحي بلبنان وعن الخطر عليهم وعن..
وزحفوا المسلمين يستقبلوك..
يا سلام شو هالمحبة..

انا مني واحد لو القرار لي يا قداسة البابا، مش متمسك لا بالمسيحيين بلبنان ولا بالمسلمين قبلهم..
لبنان مش بحاجة لهم..
لبنان بحاجة للانسان اللي فيه مزيج من المسيح ومحمد، مش لمسيحي ومسلم موضة وماركات متل الثياب والسيارات..
بلبنان الأديان عنا صارت متل نوادي الفوتبول..
كل واحد مع فريق..
صارت غرائز وانتماء قطيع..
كل المحرمات فيها… وممنوع فيها الانفتاح ومحبة الاخرين..
ارجع ذكرك يا قداسة البابا انو بلبنان المنافقين فيه بيقولوا لك بلد الحضارة والتقدم والعلم والديمقراطية، بس ممنوع بالقانون ان يختار الانسان فيه ان لا يكون له هوية طائفة.. يولد غصبا عنه على مذهب وما فيه يتحرر ويكون علماني وهويته فقط لبناني..
ممنوع ينتخب ويترشح الا بهوية مذهب.. ممنوع يوصل لمنصب ما ولو كان اينشتاين، لانو مش من مذهب المنصب، بما فيها حراس الاحراش.. وكلهم بيحتموا بالمرجعيات الدينية عند الحشرة..

اسال نفسك كيف في متدينين كتير وبنفس الوقت بلد مدمر ومفلس ومنهوب..
يا هني غلط او الاديان غلط. نحن راضيين بجوابك شو ما كان. بس جاوبنا..

دخيلك. أما تعمل عجيبة وتخلصهم من التخلف، او خذ المسلمين والمسيحيين المتزلفين اديان معك، وما تطول رحلتك بلبنان حتى ما يؤثروا عليك.
هيدول مولودين قبل الشياطين..

١ ديسمبر ٢٠٢٥
حسن أحمد خليل