Hassan Khalil
9 ديسمبر2022·
ليش الوضع معقد؟ بملخص بسيط
طق الزجاج هاليومين، وكشف اللي كان واضح، مخبأ.
بلا تفاهمات وبلا تحالفات ولا من يحزنون. كل طرف المهم مصلحته شخصيا..
والمفتاح؟
اثنين حاكمين البلد للي عجبه، واللي ما عجبه.
واحد حاكم بالمال، وشاري اغلب السياسيين والصحافة والقضاء وزواريب النفوذ. اللي ما له سعر بالمال بتنشره الصحافة، وخاصة التلفزيونات، وبيعطل حياته القضاء…
والتاني بالسياسة، وتركيب الطرابيش وإخراج الأرانب. وتوزيع مغانم المحاصصة.
وإلا اللي ما بيرضى بالحصة او ما بيرضخ، بيتفركش بالشارع، او الموتسيكلات بتطلع له غيرة شيعة شيعة شيعة… او بيفلتوا جحافل، ما لها اسماء، على التواصل. طبعا مع صور للسيد موسى وغيره..
حياة ملايين الناس متعلقة بهالشخصين. اللي صار مع الوزير الارمني نموذج. رضخ.. ومشي له عقد جديد مع الدولة، وراح بوفد رسمي على السعودية.
هيدا وزير وهيك. فكيف شحار وتعتير مواطن عادي.
بيعرفوا نقطة ضعف كل واحد، وبيقرصوا فيها، من وظيفة، لرخصة ما، حتى للاولاد.
لو بس بينعمل فيلم Netflix على شبه مسلسل Scandal, حول كيف من مجلس النواب ونزول لاصغر مواطن، كل واحد له سعر، ليكسر الارقام القياسية.
في طرف واحد فيه يؤثر، وقرر من زمان انو همه بمكان تاني، وما اقتنع بأهمية وجود اولويات، مش اولوية واحدة بس. ولا اقتنع باهمية وجود دولة مع هدفه. وللأسف ما الظاهر سيقتنع.
وهالواقع للفكر السياسي، بتعقيداته، سيكتب عنه مستقبلا..
عودة الى الشخصين. الظاهر قاعدين لآخر دولار، واخر جثة متحركة او جامدة.
بيعرفوا شو صار كوارث، ولا كأنه صار شيء. بيضحكوا للسقف..
كل يوم بيزيد جبروتهم أكثر وأكثر .. ولا كأن الموت عندهم إحتمال..
لذلك مش بس راحوا الودائع. راح الحاضر والمستقبل.
انسوا لبنان الى ان يتغير هالواقع.
انسوا ودائع ومصارف ودولة ومجتمع.
الحل من برا فقط، (ومش عسكري قبل ما يخون البعض) ، مش من جوا.
ببلش الفرج اذا سمعتوا بتحقيق حول حساب سياسي واحد. وهيدا ما مبين لانو برا هيك بيبتز السياسيين جوا. بيصيروا خدم لبرا واسياد على جوا، وما بيشبعوا مال وسلطة.
واللي ما عجبه يبلط البحر. وما حيبلط حتى تحت قدم واحدة له.،
ضيعانك يا لبنان.
كان حلمنا نعيش فيه اخر مراحل العمر. سرقوا الحلم..
وبيقولوا ما تكتب يأس للناس. لازم تضلك تعطي نفحة أمل.
المشكلة يقال هالكلام، وبنفس الوقت الكل ايضا بيقولوا ان المشكلة بالناس.. يعني بيطلبوا الشيء ونقيضه..
ضيعانك يا لبنان الى ان الله يفرجها. مع اللي عالارض ما في امل. بس فيه امل..
حسن أحمد خليل
