بالأسماء لبعض اللبنانيين..
سر التاليف الحكومي.. وسر التخلف اللبناني وخاصة التخلف في المحيط الشيعي.
خلال جولات في الخليج واوروبا، تعرفت بالمؤتمرات واجتماعات جانبية على كتير لبنانيي.
~واحد بيدير رساميل واحدة من اكبر العائلات السعودية وقبلها كان يدير خزينة واحد من اكبر البنوك السعودية وقبلها كان مدير العمليات ببنك الماني. اسمه جميل.
~ واحد كان ممثل واحد من اكبر البنوك العالمية مركزه لبنان ويشتغل بالمنطقة. اسمه دان.
~واحد بيدير محافظ اكثر من 15 مليار دولار، بواحدة من اكبر الشركات العالمية مركزه جنيف اسمه مارسيل.
~ واحد يمثل واحدة من اكبر الشركات في ادارة المحافظ في العالم باكثر من 60مليار مركزه دبي. اسمه راغب.
~مجموعة لبنانيين اقتصاديين مستشارين لوزارة الاقتصاد في دولة خليحية. واحد منهم فلتة ذكاء ما صار عمره 30 سنة، وصار في واحدة من اكبر شركات المحاسبة العالمية. هو اول من كشف تزوير ارقام البنك المركزي في لبنان. اسمه اندي.
~ لبناني مسؤول منطقة الشرق الاوسط في اكير البنوك الالمانية اسمه سعد.
~ واحد كان مسؤول الشرق الاوسط في بنك انكليزي ومن اكبر البنوك العالمية مركزه جتيف اسمه صبحي.
~ واحد تعرفت عليه البارحة هو شريك ومنتج ويدير واحدة من اكبر الشركات العالمية الاميركية في المالية فوق ال 100 مليار دولار. اسمه فيليب صديق جميل.
~وواحد في جنيف يدير واحدة من اكبر شركات الادوية في العالم و على محالس إدارة لاكبر الشركات العالمية للماكولات والفنادق. اسمه جيلبير.
~ وواحد اليوم وصل لمركز عالي في واحدة من اكبر الشركات العالمية في تملك الشركات والاصول مركزه نيويورك اسمه عامر. وهلق رجع على لبنان.
كل هول والاف من مصرفيين ومحامين عالميين وصناعيين ورجال اعمال وشركات والاف مؤلفة من اللبنانيين بيحبوا لبنان، وبس نحكي معهم عن لبنان بيهزوا براسهم..
ليش؟
لانو لازم يتبناه زعيم طائفة بالكاد يعرف يتهجى اسم شركته. وبس يحكوا فيه بلبنان بيتحجم وببطل الناجح برا، وبيصير ماروني وسني وشيعي ووو..
وبيصيروا يقولوا لك :، ما هو خي فلان وابن اخت فلان، وبيصيروا يحكوا معه ويربحوا جميل، ليدبروا له موعد مع البطريرك او المفتي او زعيم الطائفة.
ولانو كل الزعامات بتفرض الولاء والالتزام بمطالب الزعيم اذا اختار احد منهم. ولذلك اغلبهم قرفوا وضلوا برا..
عند الشيعة الوضع اسوا باضعاف، لانو مش متل باقي الطوائف في احترام بالتعامل. في اذلال واحتقار.
اصلا ما في رجل دين لازم يزوروه. ما تعين بعد..
المهم يقدم الطاعة عند الزعيم..
طيب اليوم ليش في ازمة في اختيار وزير لوزارة المالية.
لانو الزعيم ما عنده ناس كفاءات يختار منهم. عنده بس النماذج اللي شفناها من 30 سنة وجاي. واللي بيلتزموا بالولاء المطلق. كفاءات مع ولاء ما عنده حدا.
لذلك في كباش. صار الرئيس المكلف بدو هو يسمي حدا.
احسن سيناريو وصلوا له انو يقترح الرئيس المكلف حدا، بس شرط ما يكون في غضب عليه من الزعيم.. لما قدمنا للزعيم سنة 2001 مشروع تحويل انترا لاكبر بنك استثماري براسمال مليار دولار، ما سمع ولا بدو يسمع. المهم كيف السيطرة عليه.. وكذلك لما كان بدنا نعمل “بنك الفقراء”، لتمويل المعدومين، براسمال من الامير طلال بن عبد العزيز رحمه الله. نفس الأمر. والحلو كلف حدا من العائلة تتابع معنا الموضوع. راح البنك وضلوا الفقراء..
هيدا الوضع عند الطوائف كلها وخاصة عند الشيعة هو ماساة لبنان ودمار لبنان.
وما في حل الا بتحرير لبنان من هالواقع.
في لبنانيي بيديروا شركات حجمها اضعاف الناتج في لبنان.
لذلك ما يحصل في لبنان جريمة لا تغتفر.
وبيجي البعض يقول لك يا اخي طول بالك..
والوضع حيتحسن. الطيارات مليانة، والمطاعم مليانة.
ما في حل الا بالقانون والعصاية والسجون الغاء النظام الطائفي.. هيك بتنهي زعماء الطوائف.
اما الزعيم الشيعي بنقول له ما تتعب قلبك. شيعي وكفوء وعنده كرامة ويقدم الطاعة متل ما بدك لا لاقيت بالماضي ولا حتلاقي.
بركي. عم نقول بركي، بما تبقى من العمر بتستدرك شو عملت بالطائفة وبتصلح الامر.
عم نقول بركي..
شو؟ مستحيل..
عم نقول بركي..
١ شباط ٢٠٢٥
حسن أحمد خليل
