Hassan Khalil
4 أغسطس 2022·
من نلوم
يقال لي انه غير ايجابي ان تركز على لوم الناس دوما، وقد تأتي بنتيجة عكسية.
طيب تفضلوا..(نحول للدارج..)
اجت الصيفية، وحمص وتبولة وكاس عرق.
ونسيت الناس الودائع وتاقلموا..
نسيوا الدعم وزادت عجقة السير، وصار البنزين، وقريبا كل شيء بالدولار، وتاقلموا..
نسيوا تعاميم الهيركات ومنع السحب، وتعودوا على تخدير ال٢٠٠و٤٠٠ دولار وتاقلموا..
نسيوا انو كانت كذبة ال١٥٪ الاحتياط الالزامي الذي اصلا ما كان موجودا..
وتاقلموا مع الدولار، واقتصاد الدولار، ودولار الشنطة. وما ضل متضرر الا قطاع رواتب الليرة..واللي معه دولار بنعمة، واللي بالليرة نقمة..
وتاقلموا مع إضراب الدولة وفساد المجتمع..
واليوم ب٤آب من بيبكي الا ام وزوج واخ وابن وبنت الضحية. الباقيين المساء بيرجعوا عالحمص والتبولة.
وقت الاحتلال كان في مناطق، وكأن الناس في موناكو.
ووقت الانفجار في المرفأ، كان في ناس وكأنه ما صار شيء..
بلد ليس مقسم جغرافيا. بلد مقسم عقليا واخلاقيا. ناس عندهم وناس بلا عقول ولا اخلاق..
النتيجة: ليس فقط دولة فاسدة فاشلة، بل مجتمع فاسد فاشل..
بس اطمنوا المطاعم مليانة، ومفاوضات الغاز ايجابية..
يا حرام على هالشعب، ومن هالشعب…
وين السهرة؟
حسن أحمد خليل، تجمع استعادة الدولة
