3 سبتمبر · 2023
اخيرا خبر مفرح..
بس اغمض عينيك لحظات.
نعم. تم انتخاب رئيس للجمهورية..
وتم تأليف حكومة جديدة، فيها امهر الخبرات..
صحيح رئيس المجلس سرمدي ما بيتغير، لكن ما كأنه هو نفسه.. قرر نهج جديد، واستسمح من الجميع عن الماضي..
وتم تعيين حاكم أصيل للبنك المركزي، مخضرم في اهم المصارف العالمية..
وتم الإتفاق على قائد للجيش، ورئاسة مجلس القضاء الاعلى، وشواغر التمييز والاستئناف..
هلق افتح عينيك..
نعم.. نعم..
لا. انت مش عم تحلم..
الكهرباء 26 ساعة باليوم..
والمياة تفيض من الخزانات على السطوح.. وتشرب منها كأنها نبع.
المستشفيات جديدة..
حتى مرض السرطان اختفى..
والمجارير تتحول إلى محطات تكرير..ما عاد تصب بالبحر..
والزعماء اللي عمروا قصور وبيوت على الشواطئ، هدموها، وصارت كل الشواطئ للناس..
وأراضي المشاع رجعت للدولة..
ومعامل فرز زبالة في كل المناطق..
والكسارات السرطانية اغلقت..
نعم، نعم..
الودائع المقدسة عادت لأصحابها مع فوائدها.. وفوائد على الفوائد كمان.. والمصارف رجعت قلعت متل الحديد.
.
والدولة انتظمت. وفتحت كل الدوائر فيها، والله يعين اللي بياخذ رشوة..
والقضاء؟ شو بدي خبرك.. عدالة عمر بن عبد العزيز. وتسربت من قصر العدل لكل المفاصل، في كل المحافظات..
التدقيق الجنائي؟ ما عاد في محل بالسجون، بعد كشف اسماء المرتكبين، وسجنهم..
الناس رجعت تحب بعضها، وما حدا عم يحكي بمذهبه.. والمرجعيات الروحية نفضت المحاكم المذهبية، وما بتتدخل بالسياسة، وما عاد في سعر لأي ثوب اسود..
الاحزاب؟ شو الاحزاب؟
امل والحزب صاروا بخيمة عاشورائية واحدة، وفعلا بيحبوا بعض. وحدة صف صادقة. مش ناطرين بعض عالكوع.. خلصت هي.. الموتوسيكلات اختفت،وصارت بسيكلتات مسالمة
التيار والقوات والكتائب والمردة والاحرار، وحتى الكتلة، نسيوا الدم، وغزو المناطق متل ايام الجاهلية، واندمجوا بحزب واحد علماني، وبيحبوا بعض كتير..
وكذلك الاشتراكي والديمقراطي والتوحيد..
والمستقبل والماضي، والحوار والعزم والنجادة..
البلد كله نهضة ومحبة..
غطيني يا صفية. الله يرضى عليك. اياك تفيقيني..
ما بدي فيق. بدي اكمل هالحلم.. الدنيا احلى انا ونايم..
2 ايلول 2023
حسن أحمد خليل
