30 سبتمبر · 2023
معقول صديقنا منصوري صرح هيك كلام..
“منصوري: “المركزي في لبنان هو من أهم المصارف المركزية في المنطقة، وأتحدّى مَن يقول عكس ذلك. ويُطلب منّا خبراء الى الخارج لتدريب مصرفيين”.
امبارح العصر دخلت القصر..
تتحدى مين؟
انا اقبل تحديك..
معليش دكتور منصوري.. خليك متواضع، ما تضرب فيك سوسة السلطة..
شو قلت؟ صاروا برا يطلبوا خبراء من المركزي؟
معقول حكيت هيك؟
خبراء شو؟
مين خطر براسك؟ خبراء Forey او Optimum ؟
او خبراء تثبيت سعر صرف الليرة ب٤٥مليار دولار سرقة؟ او تعويم مصارف ب١٢ مليار دولار؟
او خبراء تسديد ديون بلولار وليرة على ١،٥٠٠، كلفت ٣٠مليار دولار؟
او خبراء لشراء محطات تلفزيون وجرائد، وصحافيين وقضاة وامنيين واحزاب ورجال دين ورجال اعمال، بمئات ملايين الدولارات..
خبراء من بنك مركزي اقترف جريمة من اكبر جرائم ضد الانسانية.
بنك مركزي توظف فيه الآلاف كترضية للسياسيين والاحزاب والقضاة والامنيين..
بنك مركزي هندس سرقة 120 مليار دولار ودائع دولار ،و60 مليار دولار بالليرة..
ما تنسى انت استاذ جامعي محترم، وبس البارحة صرت حاكم بالانابة، وفقط بسبب زعيم.. فرجاء لا تدعي، كما قلت، ان مرجعيتك لبنان، وليس لديك مرجعية سياسية..
قبلك رئيس حكومة طفشوه.. ورئيس جمهورية “ما خلوه يتهنى”.
عندك مرجعية ونص. وعند الجد بتلتزم متل الشاطر.. لو قلت هيك كانوا الناس صدقوك اكثر..
بكرا بس تتفق العصابة على المحاصصة الجديدة، بيعينوا حاكم امه ولدته ماروني، وبترجع نائب حاكم، وتمشي بأمرالحاكم الجديد، بلا نقاش..
مش هيك الوضع كل عمره..
واخيرا قلت ما رح تخلي للقضاء “ستر مغطى”، وحتكشف كل المرتكبين..
عزيزي.. التواضع سمة، او بيتعلمها الإنسان غصب عنه من تجارب الحياة..
هل انت مقتنع بهالكلام، او مقتنع ان الناس حتقتنع بالهكلام؟
يا دكتور.. ما رح تقدر تحاسب حارس المصعد عندك.
طيب. جرب بلش باللي عندك، وطلعت اسماءهم بفضيحة Optimum.
مكتبه قريب من مكتبك..
شو؟
صار بدها غطيني يا صفية..
٣٠ ايلول ٢٠٢٣
#حسن_أحمد_خليل
