30 سبتمبر · 2023
البعض اساء فهم مقالة الصبح من شوية:
مش القصد التجريح بوسيم منصوري..
~لكن تصريحه عن بطولات البنك المركزي، ذكرتنا بوزير مالية سابق، ونائب حالي اسمه بيشبه اسمي، ما رح قوله، لما قال: القطاع المصرفي اللبناني من الاصلب والاسلم في العالم، والليرة بخير.. تماما متل ما قال سلامة..
~وتصريح منصوري انه لن يترك غطاء مستر للقضاء، وسيكشف عن كل مرتكب،..
ذكرني بتصريح بنائب اسمه كمان بيشبه اسمي، ما رح قوله، لما وقف وخاطب بثقة وجراة المجلس النيابي من خلال رئيسه، وصرخ:
يا دولة الرئيس، معي ملفات لو اعلنت عنها لسقطت رؤوسا كبيرة.. وتدحرجت..
طبعا رئيس المجلس هز براسه.. واتكل على الله..
يا عمي خلص بقى..
اقله اسكتوا…
~اعملوا متل يوسف خليل.. قلو لرئيس المجلس ما خلصت كلمتي. اجابه الرئيس، نعم خلصت بيكمل عنك رئيس الحكومة.. قوم يا نجيب..
~واعملوا متل ميشال ضاهر لما المسكين بحماسة صرخ في المجلس النيابي عن طريق الرئيس، وطالب بتطبيق ال CRS.
طبعا ما حدا بالمجلس فهم شو يعني CRS, بس بعدين فهموا، ولقطوه على الCDS.
ولما شرحها النائب ضاهر، قال له الرئيس بتحكي فيها انت والميقاتي بعدين.. وكأنها موضوع خاص مش عام عن تطبيق الضريبة..
وسكت النائب..
لازم ينعمل مسلسل عن جلسات القطاع العام في لبنان..
متل حلقات ابو سليم، او مقالب غوار الطوشي وحسني البرازان..
بلبنان ما عاد في رجال دولة.. ولا دولة..
٣٠ ايلول ٢٠٢٣
حسن أحمد خليل
