17 أكتوبر · 2023
شو؟ وضحت؟
هل وضحت هلق ليش كان ضروري تحصين بلادنا ماليا وسياسيا واجتماعيا؟
من اجل يوم تبيان الكذبة وراء الكذبة.
~قالوا راسمال لبنان الادمغة..
اليوم الادمغة مشتتة، وجزء كبير من الجيل الجديد، بين مطعم وجميزة وسكاي بار..
~قالوا الخليوي هو نفط لبنان.
لعنوا ابوه سرقة ونهب، وصارت قيمته اليوم بوجودهم صفر..بعد ما كان بيوم ما فوق ال20مليار..
~ قالوا الودائع موجودة، وهي بعثروا وعبثوا باغلبها، والباقي بحساباتهم برا..كان فيه من 10 سنين ما يفوق ال 60مليار دولار..
~قالوا لبنان بلد غني مش مفلس، وعنده اصول وعقارات.. نسيوا انو الصومال ايضا عندها اراضي كمان..
صح غني بغزارة الاغبياء والجهلة.. والمجرمين..
~ قالوا الغاز هو المنقذ.. وبلشوا يجهزوا للصندوق السيادي. وطلع منظرين وبروفسورية يشبهوا لبنان بالنروج، لانهم قراوا الجرائد، وشافوا الاسم لاول مرة..
وطلعوا بالهليوكوبتر يحتفلوا نكاية ببعض، وللأن ما في غاز، ولو كان موجود، كانوا سرقوه بالطريق من قعر البحر الى سطحه.
اسهل شيء ترويج نظرية المؤامرة.. وهني المؤامرة..
واليوم الحرب على الابواب، وما في الحد الادنى من الحصانة..
شباب على الحدود حياتها على كفها.. وزعماء بتستقبل طلاب للاحتفال بنتيجة انتخابات جامعات، صارت متل مزارع الدجاج. بتفرخ بيض..
ولو صار انتخابات نيابية اليوم، بيرجعوا البعض بينتخبوهم..
حيقولوا مش هلق وقت هالحكي..
وبنقول هيدا الحكي وقته كل يوم.
وحتى في وسط المعركة..
اعداء الداخل متل اعداء الخارج..
الله يحمي لبنان من الصنفين..
١٧ اكتوبر ٢٠٢٣
حسن أحمد خليل
