٣ شباط ٢٠٢٤ الكل بيصرخ.. فهمنا..

الكل بيصرخ.. فهمنا..
طيب. قولوا لنا شو الحل؟

الحل إما داخلي او خارجي..
اذا داخلي. إما عسكري او سلمي.
اذا عسكري. بيقوم فيه إما الجيش او الشعب.
الجيش مستحيل؟ بينقسم.وبيفرط..
والشعب سلميا او عسكريا، منقسم افقيا وعاموديا. وما عنده لا عدو مشترك ولا حليف مشترك ولا اجندات او برامج او رؤية او اهداف مشتركة. ولا قيادات. كل من ايده له، وكل واحد بيشكي انو “الاخرين فاشلين، وهو على صواب. بس ما حدا عم يفهم عليه” ..

هل الحل خارجي؟ ..
الخارج ما بيعمل شيء لحدا ببلاش..
واذا قرر بدو عدة شغل جوا..
الخارج اقرب للمنظومة وادواتها اللي مطلوب تغييرها.. ولا حساب واحد بالبنوك في العالم انحجزت امواله..
اذا الخارج مبسوط هيك..

شو بينتهي الوضع؟ وشو الحل؟
هول بيسبوا بهول..
هول” بيحبوا الحياة”، وبيكرهوا اللي “ثقافتهم كلها دعوات للموت”
وبينسوا كل فساد المذاهب والسياسيين. وبيطلع معهم انو الحق كله على هوليك..
وهوليك ناطرين على الكوع. وانو حب الحياة هي بتكون بمواجهة الكذابين هوليك..
والعكس صحيح..
وعيش يا كديش لينبت الحشيش..
وكديش ينطح كديش..
وبقلاوة رح تاكلوا..
تخبزوا بالافراح..
اهضم شيء بيجي مين يقول، خلاص بدهم يقسموا، ويعملوا منطقتهم لوحدهم موناكو جديدة..
هولي ما فاهمين ان مقاطعة موناكو باوروبا محاطة بفرنسا وايطاليا وبحر نظيف..
موناكو لبنان المفترضة، بتكون محاطة ببحر بني على اخضر. وما فيك بحرك يكون ازرق، تقسمه عن بحر “الجيران”.
والجيران عبارة عن احزمة بؤس بيتبادلوا معهم نفس “المحبة الكراهية”..
ومحاطة بمليونين لاجئ سوري حيصيروا اربعة بعشر سنين.
واوعوا تنسوا انو المفترض منهم يعملوا موناكو جديدة، بعدهم لليوم ما في اثنين بيحبوا، او حتى متفقين مع بعض.. بتاريخهم في دم بين بعض، اكثر من الدم بينهم وبين “الاخرين” ..
يعني بيصير بدك تقسم موناكو الجديدة ايضا لبشري، وزغرتا والبترون وجرد كسروان وجرد جبيل وجونية.. شو بتعمل ضهور الشوير والكورة القومية؟ وشو عن زحلة؟زاروب؟
بيصرخ واحد. يا خيي انت شو خصك؟ بندبر حالنا.. بنصير موناكو مع بُعد عربي.. وننسى الفينيقية شوية.. ما هني حبايبنا..
وموناكو حتصير؟
وعيش يا كديش تينبت الحشيش..

الحل؟
الغوا الطائفية. ويرمي الكل العنصرية والكراهية بالبحر.. واعملوا الهوية بس لبنانيية.. بزعماء جدد.قبل ما تغرقوا بطوفان النزوح السوري..
شو؟ تنظير؟ ومستحيل؟
إذن.. يرمي حالهم اللبنانيين ببحر
“مونت كارلو لبنان”، واختاروا بين بحر اللون البني او الاخضر.. حسب نوع المجارير المفضل..

يا صفية بدي اسالك: دخلك بنعرف العصابة الحاكمة واحد واحد..
بس اللي بدهم يقسنوا وينفصلوا ويعملو “موناكو لبنانية” احسن؟ مش بعضهم كانوا، وبعدهم شركاء مع العصابة؟
ومش هني كلهم.. كلهم تجار مذاهب، بيستعملوا الله والدين، وما بيعرفوا الله..
بكرا الاحد. بنحكي..

غطيني يا صفية.. حاسس نفسي عم تلعي..

٣ شباط ٢٠٢٤
حسن أحمد خليل

Translate post
8:55 AM · Feb 3, 2024
·
11.8K
Views