شو السر مجددا..
~اليوم سمعت من رئيس اوجيرو انها ممكن توقف عن العمل قريبا. وسمعناها سابقا.. ساعة ازمة مال وساعة فيول.. وماشية..
~من كم يوم قالوا لبنان حيفوت بعتمة شاملة خلال كم يوم.. وبعده مضوي.. سمعناها سابقا.. كيف بتنحل كل مرة، هني والله بيعرفوا..
~سابقا قالوا ما عاد فيه مطامر، ولبنان صار على صفحات المجلات العالمية انو غرقان بالزبالة.. وبعدها اختفت السيرة، والزبالة منظمة.. كيف؟ وكيف مامن مصروفها. هني والله بيعرفوا..
~ عاشوا اللبنانيين برعب لسنة واكثر، انو ما في باسبورات على اساس ما في مصاري. فجاة صار في باسبورات واختفت الازمة.. ورخص سواقة ونافعة..
~ مع الازمة اختفت الطوابع. ثم ظهرت بعشرات الاضعاف سعرها ببلد بعده على الطوابع وما حدا بيجاوب ليش ما بيلغوها وبيعتمدوا الماكينات..
~ومولدات شغالة. واستيراد نفط شغال وموزع بالمحاصصة.. ودوائر عقارية ومنافع وتوزيعات.. كله مضبوط وماشي والبلد ماشي..
بلا رئاسة بلا حكومة بلا علاك مصدي..
النتيجة.
البعض بيقول في دولة ضمن الدولة..
لا يا حضرات مدعين الحضارات..
في دول عديدة ضمن الدولة. من عكار الى الناقورة مرورا بطرابلس وبالبترون وجبيل وجونية وبيروت والدامور والجية وصيدا وصور، صعودا الى حاصبيا والشوف والمتن وكسروان واهدن وزغرتا وبشري، وصولا الى زحلة وبعلبك والبقاع والهرمل..
ليس من احد بريء من دم هذا الصديق..
اهلا وسهلا بكم في دولة الامارات اللبنانية المتحدة.. متحدين على انو ما يكون في دولة مركزية مدنية..
متحدين انو يضلوا متزعمين على غنم بيتحمسوا بسرعة على غيرة الدين..
ومسيحياه واسلاماه..
طيب؟ والودائع؟
كمان اتحدوا عليها وعليكم.. وصحتين..
٢٢ تموز ٢٠٢٤
حسن أحمد خليل
