٥ ديسمبر ٢٠٢٤ خلاص.. خلصنا من السلاح الغير الشرعي.. يالله..

خلاص.. خلصنا من السلاح الغير الشرعي..
يالله..
هل 1701 ايضا يتضمن نزع سلاح الزعرنة والزعران في كل الداخل اللبناني؟ او بس اللي بيهدد برا؟
طيب. اللي برا عنده امم متحدة ومجلس امن..
اللبناني المخطوف من زعران لبنانيين، لمين بيروح؟ كيف بيخلص من سلاح الزعرنة؟ هل في منطقة او طائفة من كل زوايا وزواريب لبنان ما في زعران مسلحين، ومطلوبين للعدالة محمين عند زعماء..

والجيش؟ يا حرام عالجيش من ايام نهر البارد..
الزعران بيطالبوه هو يدافع عن حدود لبنان، وهو بالكاد يقدر على زعران ومسلحين الطوائف جوا.. واذا تجرأ بتهدد كل طائفة تنسحب من الجيش..

وهلق زعران الطوائف عم يتشاوروا باسم الله، ليتنخبوا رئيس جمهورية ويشكلوا حكومة..
تصوروا هولي الموجودين بيمثلوا المسيح ومارون ونقولا وبولس ومرقص؟
وهولي بيمثلوا محمد وعلي وعمر ومعروف ورضا وجعفر؟
الطرفين شياطين ما بيعرفوه لله..
لمين الشكوى؟ لله؟
ما هني زعران الطوائف حتى سرقوا الله منا..
هني زعران الطوائف ومنهم زعماء ورجال دين ومتدينين كتار وراهم، كفرونا بالاديان والمذاهب..
بسبب زعران الطوائف، مرت سنين صار الواحد يشك بالاديان كلها..
وصار يسال كل يوم: معقول الله تبعهم هو نفس الله تبعي؟
رجعت اقرا بسبب الزعران، كتب الفلاسفة مجددا وابتعد عن الكتب الدينية..
شو؟ انا كافر؟
اذا اللي بدو يعطيني شهادة تدين هو واحد من هالزعران.. فأنا كذلك..

وبيجي كم بسيط بيقول لك ما في متل لبنان.. صحيح..
والحمدلله للكرة الارضية ما في متل لبنان واللبنانيي..
(ملاحظة: فئة الزعران مش بس يعني اولاد شوارع. ممكن تضم ما يسمى رجال اعمال ومثقفين ومصرفيين ومهنيين وقضاة ومغتربين ومقيمين)..

٥ ديسمبر ٢٠٢٤
حسن أحمد خليل