٣٠ ديسمبر ٢٠٢٤ *هديتي هذه السنة الى الشعب العنيد.. "الذكي"..*

*هديتي هذه السنة الى الشعب العنيد.. “الذكي”..*

طيب اوكي and OK.
بعد انهيار النظام الظالم بسوريا، بعض اللبنانيين فرحوا.
طيب. خلينا نحكي بصراحة..
*الفرق الوحيد بين سوريا سابقا ولبنان، انو هونيك ما كان فيك تفتح تمك. بلبنان احكي متل ما بدك، بس ما حدا حيرد عليك.*
بلبنان صار سرقات تشاركوا فيها تقريبا الجميع. اسسوا منظومة المحاصصة؟ بسوريا عائلة ووزعت..
بلبنان كل زعيم ديكتاتور، وريْس منطقته ودولته..
بلبنان اتباع الزعيم الديكتاتور، ورعاياه متل الغنم.. بسوريا كان ديكتاتور واحد وازلام..
*بلبنان ما حدا بيحب حدا، وبيحلفوا انو ما بعمره كان في تفرقة قمة النفاق..*

*الفرق بين لبنان وسوريا، انو بلبنان سرقوا ودمروا متل سوريا، لكن بيدعوا انهم ملائكة ودعاة قيامة دولة..*

بدك حرية وتتحرر. اقرأ..
بدك حدا يحكيك بصراحة.. اقرأ.

*بيقولوا ما تهين الناس.. بيقول انا عم اهين “الذكي” فقط.. اللي بيعتبر نفسه غير معني ما لازم يزعل..*
بيقولوا لي ما زهقت..
واجيب لا.
بزهق اذا راحت حريتي.. وما بتروح..
اذا راحت حريتي ما لها طعمة حياتي..

*بدك حريتك؟ تحرر من عقدة “زعيم”، وفخامة ودولة ومعالي وسعادة وبيك واستاذ وحكيم وشيخ. تحرر من انو هو احسن منك.. هو حسابه بالمليارات من اموالك، وانت بتنط ليل نهار لتؤمن لقمة عيشك.. هو قاعد بقصره.. وانت قاعد ببيتك المدمر او اللي ورثته او اللي هاجرت لاخر العالم منشانه. يا “ذكي”..*
*كيف ولا يوم بتسال انو اغلب سياسيبن لبنان ما اشتغلوا الا سياسة، ومعهم كل هالأموال والثروات والاحزاب والفروع والكشافة.. والمسلحين والسلاح.. كيف؟*
*كيف ما بتسأل من وين قضاتهم وضباطهم وموظفيهم بالدولة، وازلامهم اللي ما عرفوا الا الجعدنة والكذب والقمع، عندهم هالبيوت والسيارات؟*

*ما بدك تسأل ولا سؤال؟ انت حرّ/.. المرة الوحيدة يظهر بتصير “ذكي”، هو لما بتعرف انك غبي وبتحب تضلك غبي..*

*البديل*
*بدك تطلع من نبوغتك، انضم لفكر الدولة المدنية العلمانية اللي بتفيض فيها كفاءات وخبرات وانتاج.*
*اخرج من طائفيتك ايها المسيحي والمسلم.. او مارسهما بالفعل لا بالتعصب. الديانتين تامران بالاخوة.. اخرج من منطقتك. وادخل. لبنان كله منطقتك.*

٣٠ ديسمبر ٢٠٢٤
حسن أحمد خليل