٢٥ كانون الثاني ٢٠٢٥ مبروك.. مبروك.. على مهل.. على شو؟ هندعم الرئيسين، لكن الله يعينهم. هل استعجلنا بالتفاؤل؟ .

مبروك.. مبروك..
على مهل.. على شو؟
هندعم الرئيسين، لكن الله يعينهم.
هل استعجلنا بالتفاؤل؟ .

~اخيرا مش بس انتخبنا رئيس، بل جوزيف عون نفسه. هللنا وطرنا من فرحنا. وهو فرح كتير.. فجأة اكتشف ان قيادة الجيش مع ضباطه غير الرئاسة لجمهورية مليانة وحوش مفترسة..
~ فرحنا كثير انو اجى رئيس حكومة قاضي علماني مثقف مخضرم من نيويورك الى لاهاي. وهو فرح كثير.. لكن اكتشف انو نيويورك ولاهاي غير عين التينة ومعراب وحارة حريك والمختارة والبياضة وقريبا قريطم.
~ مبروك انو نجحوا زعماء مسيحيين رجعوا متل وقت الحرب الاهلية يشدوا العصب المسيحي، ورجعت معالم الفوقية والعنصرية خاصة بعد ما اعتبروه “هزيمة” للشيعي.
~ مبروك. لاول مرة ونتيجة الاحداث وبعض الغباء اللبناني، صار الشيعي مش داخل بمعارك سياسية تقليدية، بل يشعر انو مستهدف باخطار وجودية. فاشتد العصب الشيعي حتى عند الممتعضين او العلمانيين منهم.
~ الدرزي مش بحاجة من يوصيه. متمترس بمنطقته دوما.
~ مبروك. بعض الدول شعرت بخطر تمدد الاسلام الاصولي من سوريا والاردن وتركيا الى لبنان، فقرأنا خبرية حلوة اليوم، انو سمح لسعد الحريري بالعودة الى لبنان لاحياء الزعامة السنية.. يعني شد العصب السني “المعتدل”.
تيتي تيتي متل ما رحتي متل ما جيتي.
ومطرح ما قطف الورد شنقوه..

مبروك.. شو بدكم اكثر من هيك.
العقارات ارتفعت والمطاعم مليانة والناس متفائلة..
بتعرفوا ليش متفائلين الناس؟ . لانو بقدر ما تعبوا مع المافيات، والحروب من 50 سنة لليوم، صار همهم انو يعيشوا ويضحكوا كل يوم بيومه.. صاروا يفرحوا بزيارات وفود اجنبية وعربية. صار بدهم الخلاص ولو مع ابليس..
~وليزيد الطين بلة.. اعلن المحتل انو حيمدد احتلاله. ولا حدا برا وكتار جوا ما حكيوا شيء. المهم كل يوم بيومه…. ومين بيعرف لوين هالامر بيوصل؟

بكل هالمعطيات بدو نواف سلام يؤلف حكومة.
وبتزيد عليها اضافة لأزمة وزارة المالية، مطالب المسيحيين والدروز والمستقلين والتغيريين.. والحقائب.
قرر الرئيسين يتفاوضوا..
ركبتهم فوبيا كل اللي قبلهم، انو ما فيهم يكونوا على خلاف مع بري. ولا بصدام مع الحزب والشيعة. ولا فيهم ما يراضوا التمثيل المسيحي باكبر كتلتين. ولا يزعل البيك الدرزي (على الاقل خياره الوزاري اللي قراناه مشرف)، وقريبا التمثيل السني قريب من المستقبل. وتخبزوا بالافراح.

*~لكن ما تنسوا انو القطبة المخفية هي انو هالحكومة هي اللي حتعين العشرات من كل الشواغر في المناصب الرئيسية. وهي حتشرف على الانتخابات النيابية اللي مش معروف على اي قانون انتخاب حتصير..*

مبروك. مبروك..
حيقول البعض نغصت عليه تفاؤله.. يعذروني..
انا زعلان من حالي انو بركي استعجلت بالتفاؤل..
يا رب كون غلطان..

٢٥ كانون الثاني ٢٠٢٥
حسن أحمد خليل