*خلاص يا ريس نواف.. خلاص..*
بقيوا سنوات يروجوا لك. قلنا بركي بيعرفوا شي ما منعرفه..
وصلت..
قلنا نطول بالنا. بركي بعدك عم تحضر شو استراتيجية سرية، وبكرا بتخبرنا..
يا دولتك. سمعنا خطابك البيان الوزاري. ما ذكرت الازمة المالية والودائع، عصب القيامة، الا ضمن تفعيل القضاء..
قلنا بركي عم تحضر شيء..
سمعناك بيوم المرأة..
واليوم سمعنا مقابلتك عم تحكي مصري..
*يا اخي.. الناس محروقة. بدها تعرف شو حتعمل خطة؟ مين فريق عملك؟ وين الوزراء اصحاب السبر الذاتية الممتازة؟ ما عرفنا شي بعد عن الكهرباء اللي ما ضل حدا ما نق عليها.. ولا عن موارد المياه وتوصيلها للبيوت.. ولا عن التربية ولا الزراعة والصناعة والسياحة. بس للانصاف، اقوياء بالخارجية؟*..
*ولا عن التدقيق في البنك المركزي، اللي ما خلوه للطفل البريء منصوري يعمله، والمالية اللي سمعنا عن معاناة وزيرها بعد كشفه كم فضيحة، وما عاد حدا حكي فيها… ولا عن المحاسبة.*
شو اخبار نفض القضاء؟
لكن الحلو، من اول تكليفك رضخت لإعلام الفجور، وطلبت من وزير بتمون عليه، يظهر على محطة مش اخرى..
*بالمناسبة. وزير إعلامك شو اخباره. شو بيعمل غير قراءة “بثقة”، مقررات جلسة مجلس الوزراء كل اسبوع.؟*
ما شايف معاليه تلفزيونات وجرائد الاهانات اللي بتهاجم حكومتك بسخرية كل مرة..
كل يوم بنكتب ونقول بدنا اياك تنجح. وداعميناك. لكن انت لهلق مش داعم حالك..
يا عمي شو كلمة منكم عن رؤيتكم عن المصارف والودائع متل كلمة رؤيتكم لدور المرأة..
*طلع المهم بس قرار الحرب والسلم، وبالمصري والاسكندراني. واللي بتصرح عنه بجرأة وثقة. بينما بباقي الامور خجل وصمت..*
*شو قررتوا عن الحاكم، ونوابه… وعن المدعي العام التمييزي والمدعي العام المالي… هل كمان حتعمل وقت تشكيل الحكومة؟.. ويطلع حدا يقول لنا انو في مسيحيين قلقانين على حقوقهم.. بينما ما عندهم مشكلة لو يرجع لهم رياض. وفي شيعة مجروحين، وسنة اهل جماعة، بيستنهضوا علي وعمر.. . وبالنهاية ما بيقبلوا وما بيرضوا الا اللي بيرضى فيه “الاستاذ” الشيعي، ورئيس حكومة الظل السني..*
يا ريس نواف. بدنا اياك تنجح..
*بس الله يرحم اللي قال: بدك تعرف الشخص؟ شوف نوعية اللي حوله واللي على اذنه..*
رجاء. ما تخلينا نقول بركي الافضل يرجع الاصيل.. فؤاده ه. ه. ه..
او تخلينا نترحم على نجيباه ه ه ه..
٢٤ آذار ٢٠٢٥
حسن أحمد خليل
