٦ كانون الثاني ٢٠٢٦ احلى نكتة رقم ١ في الخطة المالية..

احلى نكتة رقم ١ في الخطة المالية..

وسط هالمعمعة، وضعت حكومة ابو عمر الخطة
النووية.. .
سالني مغترب لبناني قضى ٦٠ سنة من عمره بالاغتراب..
قال لي: اسمع هالنكتة..
يا اخي لحقوني البنكرجيي سنين وسنين، بايعاز من المركزي، لحط وديعة معهم، وانو في سرية مصرفية. افترضت المركزي هو الاساس.
حطيت مليون دولار مع بنك A وديعة لسنة، على اساس البنك المركزي والمصرف A هو نفسه, يعني مش وديعة عند ابو رياض البقال..
مركزي ومصارف لحقوني ولحقوني يعرضوا علي فوائد، وبعدها قرروا يصنفوني “فاحش” وبيطالوني بالفوائد اللي هني لحقوني يعرضوها علي.. كيف؟اشرحها.. فيك؟
لكن مش هون بس النكتة..
النكتة انو بيطالبوني رد الفوائد على وديعتي، او ضريبة عليها..
ووديعتي الام الاصل، يياخذوها مني، وبيعطوني فيها كمبيالات بعد ١٥ و٢٠سنة.. ما بتسوى ورق لف سندويشات.. يعني بيسرقوا الوديعة، وبيطالبوني بالفائدة عليها، اللي هني اعطوني اياها وما اعطوني اياها لان الفوائد بعدها عندهم، او بدي جيبها من برا بعد ما استعملتها لعلمت أولادي وطبابة زوجتي. اما اللي اخذها وهاجر.. خرج ولم يعد.. ملقطين فيي انا

ما خلصت النكتة:
بعد ووديعتي على سنة، عرض علي مصرف B استثمار واقنعني انو مضمون.. وعرض علي قرض بمليون دولار للدخول في الاستثمار.. دخلت..
اليوم عم يطالبني بالقرض مع فوائده..
فهمته انو عندي وديعة ببنك A، وبس تستحق بعد ٢٠ سنة القرض بسدد القرض
صرخ بوجهي.. انا بدي انتظرك ٢٠ سنة وبدون فوائد؟ انا بدي القرض اليوم ومع فوائده..

يعني عندي مليون وديعة بدون فوائد.. وعندي مليون قرض مع فوائد.. الوديعة طارت والقرض مطلوب.. اريد حلا… كيف هيك. فهمت؟
ليش عم تضحك؟ اللي حطوا الخطة من جامعات مهمة؟

٦ كانون الثاني ٢٠٢٦
حسن أحمد خليل

نكتة تانية في الخطة المالية..
صاحبي قال لي انو عنده مليون دولار بحساب فريش.. يعني طازة. يعني مش حساب معفن ما عاد يتاكل..
بس حاططهم ببنك صغير ما معه يرد ال١٠٠الف دولار بس ينفذوا الخطة المالية..
بركي استعملوا ووديعتي الفريش ليردوا للمعفن..؟
وشو بعمل اذا الدولة افلسته.. شو بيصير بوديعتي الفريش؟ قوانين الافلاس لا تفرق بين اصناف المال. هل بتعفن متل المعفنين..
بتعرف شو؟ اذا اقروا هالخطة، رح اسحب المصاري الفريش لغاية ما بطيخ يكسر بعضه..

٦ كانون الثاني ٢٠٢٦
حسن أحمد خليل

نكتة ثالثة في الخطة المالية..
واحد صاحبي قال لي انو البنك طلب منه كشف عن مصدر المال اللي بوديعتي..
قال للبنك انو هو ورثه من والده اللي اشتغل مع جده في افريقيا من ٧٠ سنة..
البنك قال له انو يحتاج لتثبيت مصدر المال كل حسابات الشركة وميزانياتها وبياناتها الضريبية اخر ٢٥ سنة، والا تعتبر الوديعة غير مشروعة..
صاحبي: يا عمي والدي وجدي ماتوا.. وما كان في عندهم بيانات ولا حسابات.. وكل عمركم تستقبلوهم او تروحوا لعندهم وتطلبوا يزيدوا بالحساب..
خلاص.. غير مشروعة.. بلط البحر.
بدنا نوصل لهدف نمحي ٣٣ مليار دولار من الودائع..
Bad luck.. وديعتك غير مشروعة..
اسال اللي وضعوا الخطة.. هني من جامعات ومحاكم عالمية..
صاحبي: لا مش رح اقبل، ورح ارفع دعوى عليكم..
الدولة: ارفع دعوى. اصلا انت اهبل. القضاء في ايدنا وشريكنا..
في غيرك ٢٠٠ الف دعوى وحتعفنوا في قصر العدل اللي ما في كهرباء والمياه بتدلق على الملفات.. ليجي دورك بيعفن الملف وبيورث ابنك الدعوى..

٦ كانون الثاني ٢٠٢٦
حسن أحمد خليل

نكتة رابعة في الخطة المالية..

حطوا غرامة٢٠٪ او ٣٠٪ على المقترض اللي سد قرضه على ١٥٠٠
يعني واحد مديون دولار واحد. صار قرضه ١٥٠٠ ليرة.
كلفه سداد القرض ٢سنت فقط ليرد الدولار..
اليوم جايي الدولة تغرمه ٣٠ سنت. كلفته الاجمالية ٣٢ سنت. يعني نفذ بريشه ب ٦٨ سنت.
هذا في حال نفذت الحكومة خطتها. بس ما رح تقدر بسبب فوضى القضاء والبرطيل والرشاوى والتسويات.
يعني بيكون سد القرض ب٣٢٪ من قيمته.. وعفا الله عن ٦٨٪ اللي اصلا انسرقوا من وديعة شخص آخر..

ما خلصت.. المقترض اللي قرضه بالدولار وسدده باللولار اللي اشتراه من مودع محروق، ما عليه غرامة ولا في تعويض للمودع المحروق. الدولة بس بتعوض لحالها..
بترفع الصوت.. يا دولة ومركزي. انتو اللي ورطتونا بكل هالمعمعة..
برد عليك صدى: مين قال تسمع لنا.
ارفع دعوى..
كيف؟ لبناني ذكي..

٦ كانون الثاني ٢٠٢٦
حسن احمد خليل