٢٧ أيار ٢٠٢٦ كريم سعيد… وصحوة التدقيق الجنائي..

كريم سعيد… وصحوة التدقيق الجنائي..

فجاة وبعد سنة ونص من تعيينك فقت يا كريم.. وتكارمت علينا بتكليف الفاريز Alvarez لإجراء تدقيق جنائي..
بشرفك يعني عم تتذاكى علينا.. سنة ونص وهلق فقت؟ بشرفك اخبرنا مين اوحى لك، ولينتقم من مين؟ او ليبتز مين؟ او ليضغط على مين؟
يعني اكيد ما حتقتنع حنصدق انو نزل عليك وحي وصحوة ضمير..
طيب.. حنقترح عليك.. ما ضرورة تدفع مصاري.. انا والقاضية غادة عون بنتبرع ببلاش.. عندنا ملف اوبتيموم بالكامل.. نفتح نحن واياك باندورا اوبتيموم وبتلاقي كل الاجوبة.. اسال نائبك وسيم منصوري اللي عزلته. اساله عن اوبتيموم..
شو رأيك؟ وما بتدفع ولا دولار.. ونحن بنكفل نعطيك كل الاسماء والتفاصيل..
هل بيتعاون معك وزير اللاعدلية، واللامدعي عام التمييزي واللا مدعي العام المالي..؟
دخلك بعده اللامدعي العام المالي السابق عضو في لجنة اللاتحقيق الخاصة العامة؟ سمعنا تقاعد.. ضيعانه.. انتظرته السجون ليملأها ويعبيها.. بس ما لقى مرتكب واحد.. وكذلك المدعي العام التمييزي السابق اللي صادر ملف اوبتيموم من غادة عون ومنع كل الضابطات العدلية تنفذ طلباتها.. وانطفى نور الملف..
بشرفك كريم سعيد.. ما تتذاكى علينا بشرفك.. الحبل صار قصير كثير..
يا عمي الحق “الكذاب” على بيته.. كلفنا وخذ نتيجة.. واذا اخفقنا.. قاضينا..

٢٧ أيار ٢٠٢٦
حسن أحمد خليل