*البرغش في لبنان.. والله*
*تريدون حلا في لبنان اذا نفذ ولم يتفتت في هذه الحرب؟*
اولا الاعتراف ان الجميع برغش.. ما في ولا نحلة ولا دبور واحد.. وانو البرغش ما بيعمل عسل..
بلد البرغش منذ ولادته..
*واعترفوا انه بلد الخيانات والكراهية منذ ولادته..*
بلد كراهية برغش، وخيانات منذ العثمانيين وقدوم الانكليز والفرنسيين.. ثم عبد الناصر وحلف بغداد، الى منظمة التحرير ونظام الاسد.. الى الطائف وبابا نويل الحريري.. الى غازي كنعان ورستم غزالة.. الى بشار والدوحة.. الى الخليجي والفرنسي والاميركي والايراني..
برغش وتبويس ايادي ولحى وطعن وقلب بارودة من كتف.. حقد وكراهية وخيانات..
ليس من دبور واحد.. الكل برغش..
والاداة الموحدة عند البرغش: الله والاديان.. وحب لبنان والسيادة..
*ايها المتدينون والمتلبسون دين:*
جربوا مرة واحدة تريحوا الله..
ما اقتنعتوا بعد انو مشغول بالنظام الكوني اللامتناهي ومش فاضي لبرغش ارضي كذاب منافق..
جربوا مرة “الزهايمر” الاديان.. ما حدا يذكر الله ولا المسيح ومحمد والخلفاء والصحابة وعلي والحسين والائمة.. الا لوحده بصلاة او تأمل..
جربوا مرة تقولوا نحن من دماغ وقلب ودم ولحم وعظام ومعدة ومصران وكبد وبنكرياس ويدين واجرين وبس، وبعد كم لحظة او ثانية او دقيقة او ساعة او يوم او شهر او سنة حنكون في حفرة مترين بمتر.. لا مسلم ولا مسيحي.. فقط كتلة من الاطراف والاحشاء متل بعضنا..
انسوا سنة البطريركيات ودور الافتاء والكنائس والجوامع والحسينيات.. ما تدوروا على الله هونيك.. الله لو صادقين في كل جينية وذرة في جسمكم وروحكم.. لتوصلوا لله مش بحاجة لخوري ولا لشيخ ولا لمفتي ولا لبطريرك.. شيلوهم من راسكم.. (عذرا سيدنا ومولانا) ..
بس السؤال: هل البرغش فعلا بيعرفوا الله وبدهم يوصلوا له؟ او بس مشغولين كل يوم يشتموا ويسبوا ويخونوا بعض؟ هيدا السؤال..
والسؤال الثاني. هل الله بعده ما شاف ولا سمع عن صور ودير قانون.. عن مشغرة ودبين.. عن عيناتا ومروحين.. عن بنت جبيل وصريفا والشقيف والنبطية وشوكين. معقول..
يا عمي. الله مش فاضي لكم..
شو مرة بس اعرفوا انو انتو المهم.. انسوا حكامكم الزفت وزعمائكم الزفت.. يا عمي العنوا ابو دولتكم وزعمائكم.. شو مرة بس.. حاسبوهم..
شو مرة بس..
وينك يا صفية.. غطيني.. ما فيش فايدة..
٣٠ أيار ٢٠٢٦
حسن أحمد خليل
